الموڑہ میں کار گہری کھائی میں گری، ایک شخص کی موت، دو زخمی

الموڑہ،  اتراکھنڈ کے الموڑہ ضلع میں ہرڑا-شیتلا سڑک پر اتوار کی رات ایک کار گہری کھائی میں گر گئی۔ اس حادثے میں ایک شخص کی موت ہو گئی، جبکہ دو دیگر زخمی ہو گئے۔ امدادی کارروائی کے بعد زخمیوں کو اسپتال پہنچایا گیا۔
ریاستی آفات سے نمٹنے والی فورس (ایس ڈی آر ایف) کے سب انسپکٹر پنکج ڈنگوال نے بتایا کہ ضلعی کنٹرول روم سے ہرڑا-شیتلا سڑک پر ایک آلٹو کار کے کھائی میں گرنے کی اطلاع موصول ہوئی تھی۔ اس کے بعد خیرنا اور سریا پانی میں تعینات ایس ڈی آر ایف کی ٹیموں کو جائے حادثہ کے لیے وانہ کیا گیا۔
انہوں نے بتایا کہ حادثے کا شکار کار میں تین افراد سوار تھے۔ اس حادثے میں آنند رام (55) کی موت ہو گئی۔ وہ ڈونگر رام کے بیٹے تھے۔ جبکہ کشور کمار (35) اور کیلاش رام (46) زخمی ہو گئے۔
ایس ڈی آر ایف کی امدادی ٹیم نے دونوں زخمیوں کو کھائی سے باہر نکال کر 108 ایمبولینس کے ذریعے خیرنا اسپتال پہنچایا۔ دونوں کا علاج جاری ہے۔ امدادی ٹیم نے متوفی کی لاش بھی کھائی سے باہر نکال کر ضروری کارروائی کے لیے ضلعی پولیس کے حوالے کر دی۔