انٹرنیشنل یونانی فورم نے طب میں معیار اور تحقیق پر زور دیا

لکھنؤ، 15 ستمبر (پریس ریلیز): انٹرنیشنل یونانی فورم (آئی یو ایف) کے زیر اہتمام اور فہمینہ ہربلز پرائیویٹ لمیٹڈ کے اشتراک سے چوتھے آئی یو ایف نیشنل یونانی کوئسٹ اور دوسرے آئی یو ایف کلینکل کیس کوئسٹ 2026 کی افتتاحی تقریب ایرا یونیورسٹی، لکھنؤ میں منعقد ہوئی۔ تقریب کا مرکزی موضوع ’’کلینکل تجربات کو سائنسی برتری میں تبدیل کرنا‘‘ تھا، جس میں یونانی طب میں علمی معیار اور تحقیق پر زور دیا گیا۔
پروگرام کا آغاز گورنمنٹ طبی کالج و ہسپتال پٹنہ کے پی جی اسکالر ڈاکٹر محمد زکریا کی تلاوت کلام پاک سے ہوا۔ آئی یو ایف کے ٹرسٹی ڈاکٹر ایم شاہد ملک نے استقبالیہ خطاب کیا۔
آئی یو ایف کے بانی ٹرسٹی ڈاکٹر مبشر خان نے ’’انٹرنیشنل یونانی فورم ایک نظر میں‘‘ کے عنوان سے فورم کی سرگرمیوں کا تعارف پیش کیا۔
آئی یو ایف کے ٹرسٹی اور گورنمنٹ طبی کالج و ہسپتال پٹنہ کے سابق پرنسپل ڈاکٹر تنویر عالم نے بتایا کہ نیشنل یونانی کوئسٹ آن لائن ہوگا، جس میں بی یو ایم ایس طلبہ اور انٹرن شرکت کرسکیں گے۔ مقابلہ ۲۲؍اکتوبر 2026کو ساڑھے گیارہ سے ساڑھے بارہ بجے تک ہوگا، جبکہ رجسٹریشن کی آخری تاریخ19اکتوبر شام 5 بجے ہے۔ تین نمایاں امیدواروں کو چھٹے آئی یو ایف یونانی کون2026 میں اعزاز ملے گا۔
آر آر آئی یو ایم، سری نگر سے ڈاکٹر افصح الکلام نے کلینکل کیس کوئسٹ کے قواعد اور جائزے کے معیار سے آگاہ کیا۔ اس میں یونانی فیکلٹی ممبران، میڈیکل افسران، معالجین، سائنسدان، محققین اور پی ایچ ڈی؍پی جی اسکالرز انفرادی یا دو رکنی ٹیم کی صورت میں حصہ لے سکتے ہیں۔ کیس رپورٹ جمع کرانے کی آخری تاریخ 10اکتوبر 2026 ہے۔ بہترین تین کیس رپورٹس کو انعامات و سرٹیفکیٹس دیے جائیں گے، منتخب کیسز کی اشاعت کا بھی امکان ہے۔
مہمانِ خصوصی مرکزی کونسل (سی سی آر یو ایم)، وزارت آیوش، حکومت ہند، نئی دہلی کے ڈپٹی ڈائریکٹر جنرل ڈاکٹر یونس افتخار منشی نے کلینکل تجربات کی دستاویز کاری اور تحقیقی معیار پر زور دیا۔دونوں پروگراموں کا باقاعدہ افتتاح پروفیسر عباس مہدی، وائس چانسلر، ایرا یونیورسٹی، لکھنؤ نے کیا۔ انہوں نے زیادہ سے زیادہ شرکت کی دعوت دی۔
اختتام پر آئی یو ایف کے نیشنل ٹرسٹی اور ’زیڈ وی ایم‘ یونانی میڈیکل کالج، پونے کے پرنسپل ڈاکٹر آصف انصاری نے کلمات تشکر پیش کیے، اور فہمینہ ہربلز کے تعاون کی ستائش کی۔اس موقع پر آئی یو ایف ٹرسٹی ڈاکٹر سلمان خالد، ڈاکٹر ایاز، ڈاکٹر خورشید، ڈاکٹر پرویز عالم شامل تھے۔