کویتی وزیراعظم نے ایرانی حملو ں میں زخمی افراد کی عیادت کی

کویتی وزیراعظم نے ایرانی حملوں میں زخمی افراد کی عیادت کی
کویت سٹی، 19 جولائی کویت کے وزیراعظم شیخ احمد عبداللہ الاحمد الصباح نے ایرانی حملوں میں زخمی ہونے والے شہریوں کی عیادت کے لیے العدان اسپتال کا دورہ کیا اور حکومت کی جانب سے متاثرین کو ہر ممکن طبی سہولت فراہم کرنے کے عزم کا اعادہ کیا۔کویتی میڈیا کے مطابق وزیراعظم کے ہمراہ وزیر صحت ڈاکٹر احمد العوضی بھی موجود تھے۔ دونوں رہنماؤں نے اسپتال میں زیر علاج زخمیوں کی خیریت دریافت کی اور ان کی جلد صحت یابی کے لیے نیک خواہشات کا اظہار کیا۔اس موقع پر وزیراعظم نے متعلقہ حکام کو ہدایت دی کہ زخمیوں کے علاج میں کسی قسم کی غفلت نہ برتی جائے اور تمام ضروری طبی، تکنیکی اور انتظامی وسائل فوری طور پر فراہم کیے جائیں تاکہ متاثرہ افراد کو بہترین ممکنہ علاج میسر آ سکے۔ شیخ احمد عبداللہ الاحمد الصباح نے کہا کہ حکومت زخمیوں اور ان کے اہل خانہ کے ساتھ کھڑی ہے اور ان کی مکمل صحت یابی اور بحالی تک ہر ممکن تعاون جاری رکھا جائے گا۔