امریکی ہوٹل کاکارنامہ؛42 برطانوی طلبہ اورعملہ کے پاسپورٹس تلف کردیے،پھرمعذرت کرلی

نیوہیمپشائر،مارچ۔امریکاکی شمال مشرقی ریاست نیوہیمپشائر کے ایک ہوٹل کی انتظامیہ نے برطانیہ سے تعلق رکھنے والے درجنوں طلبہ سے ان کی سفری دستاویزات کے ضیاع پرمعافی مانگ لی ہے۔ہوٹل میں قیام کے دوران میں ایک اہل کار نے ان طلبہ اور عملہ کے چار ارکان کے پاسپورٹس تلف کردیے تھے۔برطانیہ کے والسال،ویسٹ مڈلینڈزمیں واقع بار بیکن اسکول نے اپنے 42 طلبہ اور عملہ کے چار ارکان کو اسکی ٹرپ کے لیے لنکن، نیوہیمپشائرکے کنکامگس لاج میں قیام کے لیے بھیجا تھا۔بوسٹن 25 نیوز کے مطابق 19 فروری کو بیک آفس کی صفائی اور انتظامات کے دوران میں لاج کے ایک منیجر نے غلطی سے پاسپورٹ سے بھرا ایک باکس پھینک دیا تھا۔ان پاسپورٹس کو کچرا ٹھکانے لگانے والی کمپنی نے تلف کردیا تھا اوراس نے کوڑے دان کو خالی کر دیا تھا۔کنکامگس لاج کی انتظامیہ نے کہا کہ انھوں نے فوری طور پر مہمانوں کو مطلع کیا اور اپنے مہمانوں اور ٹورآپریٹنگ کمپنی کے ساتھ مل کراس پرکام شروع کردیاتھا تاکہ کسی اطمینان بخش حل تک پہنچ سکیں۔اس کے بعد تعلیمی سیرپرگئے اس گروپ نے نیویارک میں برطانوی سفارت خانے کا سفرکیا اور ہنگامی دستاویزات کے لیے درخواست دی تاکہ انھیں واپس انگلینڈ جانے کی اجازت دی جاسکے۔ بوسٹن 25 نیوز کے مطابق انھوں نے ابتدائی طورپر 25 فروری کے اختتامِ ہفتہ پروطن لوٹنے کا منصوبہ بنایا تھا لیکن اس کے بجائے ان کی یکم مارچ کو وطن واپسی ہوئی تھی۔کنکامگس لاج انتظامیہ نے فیس بک پرایک بیان میں کہا کہ ’’ہم اس واقعہ کی پوری ذمے داری قبول کرتے ہیں اور اپنے مہمانوں اور کمیونٹی سے حقیقی معافی مانگتے ہیں۔ہم اس پربے حدافسوس ہے‘‘۔بیان میں مزید کہا گیا ہے کہ ’’اپنے مہمانوں اور ان کے اہل خانہ سے گہری معذرت کے علاوہ، ہم اپنی برادری سے صنعت کی بہترین صلاحیت کے مطابق نمائندگی نہ کرنے اوراس کی توقعات پر پورا نہ اْترنے پر بھی اپنی مخلصانہ معافی مانگتے ہیں‘‘۔