قوم کے لیے نیتا جی کی قربانی ہر ہندوستانی کو متاثر کرتی ہے: اوم برلا

نئی دہلی، جنوری ۔وزیر اعظم نریندر مودی اور لوک سبھا کے اسپیکر اوم برلا نے آج پارلیمنٹ ہاؤس کے سنٹرل ہال میں نیتا جی سبھاش چندر بوس کی یوم پیدائش کے موقع پر ان کی تصویر پر پھول چڑھا کر انہیں خراج عقیدت پیش کیا۔کئی مرکزی وزراء، راجیہ سبھا میں قائد حزب اختلاف ملیکارجن کھڑگے، اراکین پارلیمنٹ اور سابق اراکین پارلیمنٹ نے پارلیمنٹ ہاؤس کے سنٹرل ہال میں نیتا جی سبھاش چندر بوس کو خراج عقیدت پیش کیا۔ لوک سبھا اور راجیہ سبھا کے سکریٹری جنرل اُتپل کمار سنگھ اور مسٹر پی سی مودی اور لوک سبھا اور راجیہ سبھا سکریٹریٹ کے دیگر سینئر عہدیداروں نے بھی نیتا جی سبھاش چندر بوس کو خراج عقیدت پیش کیا۔اس موقع پر ‘اپنے لیڈروں کو جانیں’ پروگرام کے تحت 80 نوجوانوں نے، جن کا انتخاب وزارت تعلیم اور وزارت برائے امور نوجوانان اور کھیل کود ، حکومت ہند کے تعاون سے کیا گیا، نے بھی نیتا جی سبھاش چندر بوس کو مرکزی ہال میں خراج عقیدت پیش کیا۔ پارلیمنٹ مختلف ریاستوں اور مرکز کے زیر انتظام علاقوں سے تعلق رکھنے والے ان نوجوانوں نے وزارتوں کے ذریعہ منعقدہ آل انڈیا سطح کے مقابلوں کے فاتح کے طور پر ایونٹ میں اپنے علاقے کی نمائندگی کی۔ کئی نوجوان شرکاء نے نیتا جی کی گرانقدر خدمات پر ہندی، سنسکرت، انگریزی اور علاقائی زبانوں میں تقریر کی اور ان کی زندگی کے متاثر کن نظریات کو یاد کیا۔ پارلیمانی ریسرچ اینڈ ٹریننگ انسٹی ٹیوٹ ( پرائڈ)، لوک سبھا سکریٹریٹ نے لوک سبھا کے اسپیکر کی رہنمائی میں ‘اپنے لیڈروں کو جانیں’ کے عنوان سے یہ نیا پروگرام شروع کیا ہے۔ یہ پروگرام ‘امرت کال’ میں عظیم قومی رہنماؤں کی زندگی اور ان کی قربانیوں کے بارے میں نوجوانوں میں بیداری پھیلانے میں کارگر ثابت ہوا ہے۔اس موقع پر خطاب کرتے ہوئے مسٹر برلا نے کہا کہ قوم کے لیے نیتا جی کی قربانی ہر ہندوستانی کو متاثر کرتی ہے۔ نیتا جی کو عظیم ہیرو بتاتے ہوئے انہوں نے کہا کہ ان کی جدوجہد اور خیالات نوجوانوں کو ملک اور سماج کی خدمت کرنے کی ترغیب دیتے ہیں۔ نیتا جی کی متاثر کن شخصیت کا ذکر کرتے ہوئے مسٹر برلا نے کہا کہ قوم کے تئیں نیتا جی کی قربانی کو تمام ہندوستانیوں کو یاد رکھنا چاہیے کیونکہ یہ ہمیں نئی ​​توانائی اور عزم سے بھر د یتی ہے۔ انہوں نے کہا کہ نیتا جی کی زندگی، ان کے خیالات، ان کی حب الوطنی، ان کی قیادت، ان کی بے مثال ہمت، خود اعتمادی اور چیلنجوں سے لڑنے کی طاقت نے قوم کو ایک نئی سمت دی ہے اور تمام شہریوں میں قوم پرستی کے جذبے کو مزید مضبوط کیا ہے۔ہندوستان کی شاندار تاریخ میں نیتا جی کے اٹل یقین کا حوالہ دیتے ہوئے اسپیکر مسٹر برلا نے کہا کہ وہ ہندوستان کو ایک خود انحصار اور جدید قوم کے طور پر دیکھنا چاہتے ہیں۔ نیتا جی کو طاقت اور بہادری کا مظہر بتاتے ہوئے مسٹر برلا نے کہا کہ ان کے لیے کچھ بھی ناممکن نہیں تھا۔ انہوں نے کہا کہ آج ہندوستان نیتا جی کے دکھائے ہوئے راستے پر مضبوطی سے آگے بڑھ رہا ہے اور دنیا میں اپنا صحیح مقام حاصل کر لیا ہے۔جی 20 میں ہندوستان کی قیادت کا ذکر کرتے ہوئے مسٹر برلا نے کہا کہ نیتا جی کی یاد دنیا کو وسودھیوا کٹمبکم کے فلسفہ کو سمجھنے کی ترغیب دیتاہے۔ نیتا جی کے یوم پیدائش کا ذکر کرتے ہوئے مسٹر برلا نے کہا کہ یہ موقع لوگوں کو نیتا جی کی جدوجہد، خیالات اور نظریات سے تحریک لے کر قوم کی تعمیر کے لیے لگن سے کام کرنے کی ترغیب دیتا ہے۔