ہندوستانی برادری کا نیدرلینڈ کی ترقی اور خوشحالی میں اہم رول : لوک سبھا کے اسپیکر

نئی دہلی/دی ہیگ، اگست ۔ لوک سبھا کے اسپیکر اوم برلا آج نیدرلینڈ پہنچ گئے، جو کناڈا کے ہیلی فیکس میں منعقد ہونے والی 65ویں دولت مشترکہ پارلیمانی کانفرنس میں ہندوستانی پارلیمانی وفد کی قیادت کر رہے ہیں۔ وہ اپنے دورے کے پہلے مرحلے میں یہاں پہنچے ہیں ۔مسٹر برلا نے نیدرلینڈ کی سینیٹ کے اسپیکر جان اینتھونی بروزن سے ملاقات کی ۔ اس موقع پر دونوں لیڈروں نے پارلیمانی تعاون کو فروغ دینے اور ہندوستان اور نیدرلینڈ کے درمیان اقتصادی اور ثقافتی تعلقات کو مزید تقویت پہنچانے اور باہمی دلچسپی کے کئی دیگر امور پر تبادلہ خیال کیا۔مسٹر برلا نے سرینام-ہندوستانی کمیونٹی کے لوگوں سے بھی خطاب کیا۔ اس موقع پر خطاب کرتے ہوئے انہوں نے کہا کہ ہندوستان اور نیدرلینڈ کے درمیان مضبوط سیاسی، اقتصادی اور ثقافتی تعلقات ہیں۔ نیدرلینڈ میں ہندوستانی تارکین وطن کے تعاون کا حوالہ دیتے ہوئے مسٹر برلا نے کہا کہ نیدرلینڈ میں ہندوستانی برادری اپنی لگن، کارکردگی اور پیشہ ورانہ مہارت کے ذریعہ معیشت اور سماج کو مضبوط بنا رہی ہے۔ مسٹر برلا نے کہا کہ سمندر پار مقیم ہندوستانی برادری کے لوگوں نے تاریخی طور پر دونوں ممالک کے درمیان ایک پل کا کام کیا ہے۔ انہوں نے امید ظاہر کی کہ ان کا یہ دورہ ہندوستان اور نیدرلینڈ کے درمیان قریبی اور دوستانہ تعلقات کو مزید مستحکم کرنے میں اہم ثابت ہوگا۔اس کے بعد انڈیا ہاؤس میں ہندوستانی سفارت خانے کی طرف سے دئیے گئے عشائیے میں شرکت کی۔ اس موقع پر بات چیت کرتے ہوئے مسٹر برلا نے دنیا میں ہندوستان کے بڑھتے ہوئے وقار پر روشنی ڈالی ۔ انہوں نے ہندوستان میں سماجی و اقتصادی ترقی اور اسٹارٹ اپس اور اختراعات کے درمیان تال میل کا ذکر کیا۔ مسٹر برلا نے بیرون ملک مقیم ہندوستانیوں پر زور دیا کہ وہ ہندوستان کی ترقی سے فائدہ اٹھائیں۔قبل ازیں مسٹر برلا نے دی ہیگ میں واقع سیوا دھام ہندو سینٹر کا دورہ کیا اور پوجا کی۔ انہوں نے سیوا دھام ہندو سینٹر کے مندر میں ایک گنیش کی مورتی بھی عقیدت کے طور پر پیش کی۔ہندوستانی پارلیمانی وفد آج ٹورنٹو ،کناڈا سے ہیلی فیکس کے لیے روانہ ہوا۔