فرحان اختر اور شیبانی کا تعلق کیسے منظرِ عام پر آیا تھا؟

ممبئی،فروری۔یہ سال 2018 کی بات ہے کہ جب ایک ٹی وی پریزینٹر اور میزبان شیبانی ڈانڈیکر نے ایک شخص کا ہاتھ تھامے تصویر شیئر کی جس میں ان کے ساتھ موجود شخص کا چہرہ کیمرے کی جانب نہیں تھا۔تصویر میں ’جوڑے‘ کو ایک دوسرے کا ہاتھ پکڑے دیکھا گیا، اس کے فوراً بعد تصویر میں شیبانی کے ساتھ والا شخص ’مسٹری مین‘ کے نام سے جانا جانے لگا۔کچھ روز بعد ہی شیبانی کی جانب سے شیئر کی جانے والی تصویر فرحان اختر نے اپنے انسٹاگرام اکاؤنٹ کی بھی زینت بنائی جس کے بعد سے اس ’مسٹری مین‘ کا راز کھل گیا۔وہ دن ہے اور آج کا دن ہے کہ جب یہ دونوں رشتۂ ازدواج میں منسلک ہونے جارہے ہیں۔1 ستمبر 2018 کو شیبانی ڈانڈیکر نے ’پْراسرار آدمی‘ کے ساتھ ہاتھ پکڑے پوسٹ شیئر کی، اس کے فوراً بعد یہ قیاس آرائیاں شروع ہوگئیں کہ تصویر میں نظر آنے والا شخص فرحان اختر ہے۔شیبانی کی جانب سے کسی تصدیق کے بغیر ایسی تصویروں کے سامنے آنے کے بعد مداح مختلف قیاس آرائیاں کررہے تھے اور متجسس تھے۔15 دن بعد یعنی 15 ستمبر 2018 کو فرحان اختر نے اپنے انسٹاگرام اکاؤنٹ پر شیبانی کے ساتھ وہی تصویر پوسٹ کی اور یہی وہ ثبوت تھا جس کی ہر ایک کو ضرورت تھی۔فرحان اختر نے شیبانی کے ساتھ تصویر شیئر کرتے ہوئے سرخ دل والے ایموجی کا بھی استعمال کیا تھا۔