سعودی ولی عہد کا ثقافت اورسیاحت کی ترقی کے لیے نئے فنڈ کے اجراء کا اعلان

ریاض،جنوری ۔ سعودی عرب کے ولی عہد شہزادہ محمد بن سلمان نے ایونٹس انویسٹمنٹ فنڈ (ای آئی ایف) کے اجراء کا اعلان کیا ہے۔اس کا مقصد مملکت بھرمیں ثقافت، سیاحت، تفریح اورکھیلوں کے شعبیکے لیے پائیدار انفراسٹرکچر تیار کرنا ہے۔نیا قائم کردہ فنڈمملکت کے ویڑن 2030 کے اہداف کے مطابق ایک متحرک اور فعال سعودی معاشرے کی تشکیل میں کردار ادا کرے گااورغیر ملکی سرمایہ کاری میں اضافے کے مواقع پیدا کرے گا۔سعودی پریس ایجنسی کی رپورٹ کے مطابق،’’فنڈ 2045ء تک 28 ارب ریال (7.45ارب ڈالر) کے جی ڈی پی کے لیے براہِ راست غیر ملکی سرمایہ کاری کے مواقع کوفروغ دینے اوربڑھانے پرتوجہ مرکوزکرے گا‘‘۔ای آئی ایف ویڑن 2030 کی اہم بنیادوں میں سے ایک کی سرکردہ کردار ادا کرے گا۔اس ویڑن کے تحت مملکت کی معیشت کو متنوع بنایا جارہا ہے اور’’غیر تیل سالانہ جی ڈی پی میں سیاحت کے شعبے کی شراکت کو بڑھانے کی حمایت کر رہا ہے۔اس وقت سیاحت کی مجموعی قومی پیداوار میں شرح 3 فی صد ہے اور سعودی عرب اسے 2030 تک 10 فی صد بڑھانا چاہتاہے۔ایس پی اے نے مزید کہا کہ اس فنڈ کا مقصد نجی اور سرکاری شعبوں کے درمیان مقامی صنعت کو فروغ دینے کے لیے تزویراتی شراکت داری پیدا کرنا ، ایونٹس انڈسٹری میں معاون ماحول کو محفوظ بنانا اور شہریوں کے لیے روزگار کے مواقع اضافہ کرنا ہے۔ای آئی ایف کا ایک مقصد سعودی عرب کو ایونٹس کے شعبے میں عالمی مرکز اورعالمی سیاحتی مقام کے طور پر پیش کرنے میں کردارادا کرنا بھی ہے۔رپورٹ میں مزید کہا گیا ہے کہ ای آئی ایف 2030 تک 35 سے زیادہ مقامات کی ترقی کا تصور پیش کرے گا،ان کی مالی اعانت اور نگرانی کرے گا ، جہاں اس کے اثاثوں میں انڈور ایرینا ، آرٹ گیلریاں ، تھیٹر ، کانفرنس سینٹرز، ہارس ریسنگ ٹریک اور آٹو ریسنگ ٹریک شامل ہیں۔فنڈ کا ہدف 2023ء میں اپنا پہلا اثاثہ فراہم کرنا ہے اوروہ اعلیٰ ماحولیاتی، سماجی اور گورننس (ای ایس جی) معیارات کو برقرار رکھنے کے ذریعے مملکت کے پائیدارایجنڈے کی تکمیل کے لیے پرعزم ہے۔