آسٹریلین مٹی سے پاکستان میں وکٹیں بنانا زبردست منصوبہ، ڈیمئن ہوف

کراچی،جولائی۔ ایڈیلیڈ اوول کے چیف کیوریٹر ڈیمئن ہوف نےجمعے کو نیشنل اسٹیڈیم کراچی کی پچز اور آؤٹ فیلڈ کا معائنہ کیا۔ انہوں نے کیوریٹرز اور گراؤنڈ اسٹاف سے ملاقات بھی کی۔ کراچی میں اپنے تین روزہ قیام کے دوران وہحنیف محمد ہائی پرفارمنس سینٹرکی پچز اور ان کی تیاری کیلیے دستیاب سہو لتوں کا جائزہ لیں گے۔ ڈیمئن ہوف کا کہنا ہے کہ آسٹریلوی مٹی سے لاہور اور کراچی میں پچز کی تیاری زبردست منصوبہ ہے۔ ان پچز سے پاکستان کے کھلاڑیوں کو دورہ آسٹریلیا کی تیاریوں میں معاونت ملے گی۔ پاکستان میں گراؤنڈ اسٹاف کے جذبے اور عزم سے بہت متاثر ہوئے ہیں۔ آسٹریلوی پچ ماہر نے کہاکہ اچھی وکٹ وہ ہوتی ہے جہاں بیٹرز اور بولرز دونوں کو سپورٹ ملے۔ آسٹریلیا میں اچھی پچ اسے مانا جاتا ہے کہ جہاں ایک دن میں 300 رنز بھی بنیں اور 10 وکٹیں بھی گریں۔ آسٹریلوی مٹی آئندہ ہفتے کراچی پہنچے گی۔ اس مٹی سے نیشنل اسٹیڈیم کراچی، نیا ناظم آباد کرکٹ گراؤنڈ کراچی، قذافی اسٹیڈیم لاہور اور نیشنل ہائی پرفارمنس سینٹر لاہورمیں ایک ایک پچ تیار کی جائے گی۔