ترواننت پورم میں سعودی عرب جانے والی ایئر انڈیا ایکسپریس کی پرواز کی ہنگامی لینڈنگ

ترواننت پورم، فروری۔کوزی کوڈ انٹرنیشنل ایئرپورٹ سے سعودی عرب جانے والی ایئر انڈیا ایکسپریس کی پرواز کو جمعہ کی صبح تکنیکی خرابی کے بعد ہنگامی لینڈنگ کرنا پڑی۔ ہائیڈرولک سسٹم میں خرابی پیدا ہونے کے بعد دمام جانے والی پرواز کو 12.15 بجے کے قریب بین الاقوامی ہوائی اڈے پر اترنے کی اجازت دی گئی۔ تمام 182 مسافر اور عملہ محفوظ ہے۔ ترواننت پورم بین الاقوامی ہوائی اڈے نے تمام ہنگامی خدمات کو بلایا اور طیارے کے کپتان کو ایندھن ڈمپ کرنے کو کہا گیا اور پھر بحفاظت لینڈ کیا۔ ایئرپورٹ اتھارٹی آف انڈیا کے حکام نے اسے ‘ایمرجنسی لینڈنگ’ قرار دیا ہے۔ ابتدائی طور پر حکام نے فیصلہ کیا تھا کہ طیارہ کوچین انٹرنیشنل ایئرپورٹ پر لینڈ کرے گا لیکن بعد میں اسے تبدیل کر کے ترواننت پورم کر دیا گیا۔ ایئرلائن حکام اب مسافروں کے آگے کے سفر کے انتظامات کریں گے۔