بی جے پی بدلے کی سیاست کررہی ہے: شرد پوار

ممبئی، اکتوبر ۔ نیشنلسٹ کانگریس پارٹی (این سی پی) کے سربراہ شرد پوار نے بدھ کے روز بھارتیہ جنتا پارٹی (بی جے پی) کی زیر قیادت مرکزی حکومت پر تنقید کرتے ہوئے کہا کہ بھگوا پارٹی انتقام کی سیاست میں ملوث ہے۔مسٹر پوار نے یہاں نامہ نگاروں کو بتایا ’’بی جے پی کی زیرقیادت مرکزی حکومت انفورسمنٹ ڈائریکٹوریٹ ، انکم ٹیکس ڈیارٹمنٹ ، سنٹرل بیورو آف انویسٹی گیشن ، نارکوٹکس کنٹرول بیورو اور ایسی دیگر ایجنسیوں کا ملک بھر میں سیاسی انتقام لینے کے لیے غلط استعمال کررہی ہے‘‘۔انہوں نے کہا ’’ مرکزی حکومت اپنی طاقت کا استعمال کر لئ نہ صرف قوم پرست کانگریس پارٹی کے رہنماؤں کو نشانہ بنارہی ہے بلکہ زیادہ تر سینئر سیاستدان اس کے نشانے پر ہیں۔ ایسی چیزیں پہلے کبھی نہیں ہوئیں‘‘۔سینئر لیڈر نے کہا ’’میں نے سیاست میں 54 سال مکمل کرلیے ہیں۔ مرکزی اور ریاستی حکومتوں میں مختلف عہدوں پر کام کیا ہے۔ ہم نے اس طرح بھید بھاؤ والی حکومت کے طور پر کبھی کام نہیں کیا‘‘۔چار بار مہاراشٹر کے وزیراعلی رہے مسٹر پوار نے کہا کہ ایجنسی کے افسران مہمانوں کی طرح ہوتے ہین، انہیں قواعد کے مطابق کام کرنا چاہیے‘‘۔لکھیم پور کھیری پرتشدد واقعہ کی مذمت کرتے ہوئے انہوں نے کہا کہ اس طرح کے واقعات افسوس ناک ہیں۔ اترپردیش حکومت نے اس واقعہ کے چھ دن گزر جانے کے بعد بھی کچھ نہیں کیا۔ سپریم کورٹ کے معاملے کا نوٹس لینے کے بعد ہی حکومت نے کارروائی شروع کی۔انہوں نے کہا ’’اترپردیش کے وزیر اعلی یوگی آدتیہ ناتھ کو اس واقعہ کی ذمہ داری لینی چاہیے کیونکہ مجرموں نے کسانوں کو قتل کیا ہے‘‘۔