کورین اداکارہ 29 برس کی عمر میں چل بسیں

سیول،جنوری۔نوجوان کورین اسٹار کم می سو 29 برس کی عمر میں اچانک انتقال کر گئیں۔ڈزنی پلس سیریز سنو ڈروپ میں اداکاری کے جوہر دکھانے والی کم می سو کے مینیجر نے گزشتہ روز انکشاف کیا کہ نوجوان کورین اداکارہ اب ہم میں نہیں رہی ہیں۔ کم می سو نے 2019 کی دو فلموں میموریز اور کیونگیمز ورلڈ میں بھی یادگار کردار ادا کیے۔کم می سو کی ایجنسی لانسکیپ نے ایک بیان میں اداکارہ کی موت کی تصدیق کی اور کہا کہ اداکارہ کے اچانک انتقال سے اس کا خاندان بہت دل شکستہ ہے۔کورین اسٹار کے ایجنٹ نے یہ بھی وضاحت کی کہ اداکارہ کے اہلِ خانہ نے آخری رسومات خاموشی سے ادا کرنے کی درخواست کی ہے۔اداکارہ کی موت کی وجہ تاحال معلوم نہیں ہوسکی ہے لیکن کم می سو کے ایجنٹ نے لوگوں سے افواہوں یا قیاس آرائیوں سے پرہیز کرنے کی درخواست کی۔ایجنسی کی جانب سے جاری بیان میں کہا گیا کہ ’ہم آپ سے مخلصانہ طور پر درخواست کرتے ہیں کہ آپ افواہوں یا قیاس آرائیوں سے پرہیز کریں۔‘