پولیو کے خلاف خصوصی مہم کا آغاز، کٹیہار میں 6.54 لاکھ بچوں کوپولیو کا خوراک پلانے کے لیے 2030 ٹیمیں تعینات
کٹیہار، بہار کے کٹیہار ضلع میں اتوار کے روز22 نومبر سے قومی پلس پولیو مہم کا آغاز ہوگیا۔ ضلع مجسٹریٹ آشوتوش دویدی نے صدر اسپتال کے
احاطے میں پانچ سال تک کی عمر کے بچوں کو پولیوکی دو بوند پلا کر مہم کا باضابطہ افتتاح کیا۔ اس موقع پر ڈی ایم کے ساتھ ڈپٹی ڈیولپمنٹ کمشنر، سول سرجن اور اسپیشل ڈیوٹی افسر نے بھی اپنے ہاتھوں سے بچوں کو پولیو کی خوراک پلائی اور ان کی انگلیوں پر نشان لگاکر والدین کو مبارکباد پیش کی۔اس مہم کے تحت ضلع میں مجموعی طور پر 6 لاکھ 54 ہزار 836 بچوں کو پولیو کی خوراک پلانے کا ہدف مقرر کیا گیا ہے۔ اس کے لیے پورے ضلع میں 2030 ٹیمیں تشکیل دی گئی ہیں۔ اتوارکے روز تمام مقررہ پولیو بوتھوں پربچوں کو خوراک پلائی گئی، جبکہ 23 سے 25 نومبر تک محکمہ صحت کی ٹیمیں گھرگھر پہنچ کران بچوں کو پولیو کی دوا پلائیں گی جو کسی وجہ سے بوتھ تک نہیں پہنچ سکے تھے۔مہم کے دوران بس اسٹینڈ، ریلوے اسٹیشن، اینٹ بھٹوں، بازاروں اور خانہ بدوش خاندانوں کے بچوں پر خصوصی توجہ دی جائے گی، تاکہ کوئی بھی بچہ پولیو کی خوراک سے محروم نہ رہ جائے۔اس موقع پر ضلع مجسٹریٹ آشوتوش دویدی نے کہا کہ پولیو ایک لاعلاج بیماری ہے، لیکن بروقت پولیو کی خوراک پلاکر بچوں کو اس خطرناک بیماری سے مکمل طور پر محفوظ رکھا جاسکتا ہے۔ انہوں نے والدین سے اپیل کی کہ ہندوستان کو پولیو سے پاک رکھنے کے لیے اس بات کو یقینی بنائیں کہ کوئی بھی بچہ خوراک پینے سے محروم نہ رہے، کیونکہ ایک چھوٹی سی کوشش بچوں کو زندگی بھر کی معذوری سے بچا سکتی ہے۔انہوں نے تمام بلاک ڈیولپمنٹ افسران (بی ڈی او)، انچارج میڈیکل افسران، اے این ایم، آشا کارکنان اور آنگن باڑی سیویکاؤں کو ہدایت دی کہ وہ باہمی تال میل کے ساتھ مہم کو صد فیصد کامیاب بنائیں۔ اس افتتاحی پروگرام میں ایڈیشنل چیف میڈیکل افسر، ضلع امیونائزیشن افسر، صدر اسپتال کے ڈپٹی سپرنٹنڈنٹ، ڈی پی ایم، یونیسف اور عالمی ادارۂ صحت (ڈبلیو ایچ او) کے نمائندوں سمیت بڑی تعداد میں بچوں کے والدین موجود تھے۔محکمہ صحت کے مطابق اس مہم کا بنیادی مقصد پانچ سال تک کی عمر کے ہر بچے تک پولیو کی خوراک پہنچانا اور ضلع میں بچوں کو اس خطرناک بیماری سے محفوظ رکھنا ہے۔




