نیپال کے وزیر اعظم بالیندر شاہ پہلی سرکاری دورے پر بھارت روانہ، مودی سے ہوگی ملاقات
کاٹھمنڈو، ۔ نیپال کے وزیر اعظم بالیندر شاہ اتوار کو اپنے پہلے سرکاری غیر ملکی دورے پر بھارت روانہ ہوگئے۔ وہ نیپال ایئرلائنس کے طیارے سے
دو روزہ دورے پر نئی دہلی پہنچیں گے۔ انہیں ہندوستانی وزیر اعظم نریندر مودی نے بھارت آنے کی دعوت دی ہے۔بالیندر شاہ کی زندگی کا سفر کافی دلچسپ ہے۔ تقریباً ایک دہائی قبل وہ انجینئرنگ میں اعلیٰ تعلیم حاصل کرنے کے لیے بھارت آئے تھے۔ اس وقت شاید انہوں نے بھی نہیں سوچا ہوگا کہ ایک دن وہ نیپال کے وزیر اعظم بن کر سرکاری دورے پر اسی ملک کی راجدھانی نئی دہلی پہنچیں گے۔دلچسپ بات یہ ہے کہ جب 2015 کے آس پاس بالیندر شاہ تعلیم حاصل کرنے کے لیے کرناٹک کے شہر بنگلورو پہنچے تھے، اس وقت نریندر مودی اپنے پہلے دور میں ہندوستان کے وزیر اعظم تھے۔بھارت سے بالیندر شاہ کا تعلق صرف سیاسی دورے تک محدود نہیں ہے بلکہ ان کی تعلیمی زندگی میں بھی ہندوستان کا اہم کردار رہا ہے۔ نیپال سے سول انجینئرنگ میں گریجویشن کرنے کے بعد وہ اسٹرکچرل انجینئرنگ میں ایم ٹیک کرنا چاہتے تھے۔انہیں اعلیٰ تعلیم کے لیے بھارت آنے کا مشورہ ان کی بڑی بہن سجاتا شاہ نے دیا تھا۔ سجاتا کرناٹک کے بیلگاوی میں رہتی ہیں۔ انہوں نے بالیندر شاہ کو بتایا تھا کہ بھارت میں انجینئرنگ کی تعلیم کے لیے اچھے ادارے موجود ہیں۔ اس مشورے کے بعد بالیندر شاہ نے بنگلورو کے نِٹّے میناکشی انسٹی ٹیوٹ آف ٹیکنالوجی (این ایم آئی ٹی) میں داخلہ لیا۔ یہ ادارہ وشویشوریا ٹیکنالوجیکل یونیورسٹی سے منسلک ہے۔این ایم آئی ٹی کے شعبہ سول انجینئرنگ کے پروفیسر اے وی شریاس کے مطابق 2015 میں بالیندر شاہ کے ساتھ نیپال کے سنیل لمسال اور پروین شریشٹھ نے بھی کالج میں داخلہ لیا تھا۔ بالیندر شاہ اور سنیل ایک ہی ہاسٹل کے کمرے میں رہتے تھے۔ خاص بات یہ ہے کہ سنیل لمسال اس وقت بالیندر شاہ کی کابینہ میں بنیادی ڈھانچے کی ترقی کے وزیر ہیں۔بنگلورو میں تعلیم کے دوران بالیندر شاہ نے وہاں کے رہن سہن اور مقامی ماحول کو بھی قریب سے سمجھا۔ ان کے بہنوئی ہریش کمار کے مطابق بالیندر شاہ کو جنوبی ہندوستانی کھانوں میں اڈلی اور ڈوسا بہت پسند تھے۔ انہوں نے مقامی زبان کنڑ بھی سیکھی تھی اور عام بات چیت کرنے کے ساتھ راستہ پوچھنے والوں کو جواب بھی دے سکتے تھے۔وہ بنگلورو کی پب ثقافت سے بھی واقف ہوئے۔ اپنے دوستوں کے ساتھ اسکائی بار، چرچ اسٹریٹ اور کورمنگلا کے بعض پب میں جایا کرتے تھے۔ ان کے اساتذہ کے مطابق وہ دوستوں کے ساتھ سماج، حکومت اور مستقبل جیسے موضوعات پر گفتگو کرتے تھے۔این ایم آئی ٹی کے نائب صدر سندیپ شاستری کے مطابق بالیندر شاہ کو زلزلہ انجینئرنگ میں خاص دلچسپی تھی۔ انہوں نے اس موضوع سے متعلق پروجیکٹ اور انٹرن شپ میں بھی کام کیا تھا۔ کالج کے ڈین ڈاکٹر سدھیر ریڈی کا کہنا ہے کہ بالیندر شاہ پڑھائی میں اچھے ہونے کے ساتھ قیادت کی صلاحیت بھی رکھتے تھے۔
ایم ٹیک کی تعلیم مکمل کرنے کے بعد بالیندر شاہ نیپال واپس چلے گئے۔ کچھ عرصے بعد انہوں نے سیاست میں قدم رکھا اور مئی 2022 میں ہوئے مقامی انتخابات میں آزاد امیدوار کی حیثیت سے کٹھمنڈو میٹروپولیٹن سٹی کے میئر منتخب ہوئے۔میئر کے طور پر ان کا کام کرنے کا انداز کافی سخت تھا۔ ان کے بعض بیانات پر تنازعات بھی ہوئے، لیکن اسی دوران وہ بڑی تعداد میں لوگوں کے درمیان مقبول بھی ہوگئے۔ستمبر 2025 میں ہوئے جین زی احتجاج نے نیپال کی سیاست کا رخ بدل دیا۔ اس تحریک کے بعد کے پی شرما اولی کی قیادت والی حکومت گر گئی۔ اس کے بعد 5 مارچ کو پارلیمانی انتخابات ہوئے، جن میں بالیندر شاہ نے راشٹریہ سوتنتر پارٹی (آر ایس پی) کے ساتھ مل کر حصہ لیا۔انہوں نے جھاپا-5 انتخابی حلقے میں نیپال کے سابق وزیر اعظم اور سی پی این-یو ایم ایل کے صدر کے پی شرما اولی کو شکست دے کر کامیابی حاصل کی۔انتخابات میں وزیر اعظم کے امیدوار کے طور پر پیش کیے گئے بالیندر شاہ کی پارٹی آر ایس پی نے تقریباً دو تہائی اکثریت حاصل کی۔ اس کے بعد 26 مارچ کو بالیندر شاہ نیپال کے وزیر اعظم مقرر ہوئے۔وزیر اعظم بننے کے بعد بالیندر شاہ کے پہلے غیر ملکی دورے کی تیاریاں اکتوبر میں اس وقت آگے بڑھیں، جب ہندوستان کے خارجہ سکریٹری وکرم مسری کاٹھمنڈو پہنچے تھے۔ انہوں نے وزیر اعظم بالیندر شاہ سے ملاقات کرکے انہیں ہندوستانی وزیر اعظم نریندر مودی کا دعوت نامہ دیا تھا۔ اس ملاقات میں مجوزہ دورے اور اس کے ممکنہ نتائج پر بھی بات چیت ہوئی تھی۔دو روزہ سرکاری دورے کے دوران ہندوستان اور نیپال کے درمیان دو طرفہ تعلقات کو مضبوط بنانے کے ساتھ توانائی کے شعبے میں تعاون، تجارت، بنیادی ڈھانچے کی ترقی اور ہوائی راستوں سے متعلق اہم امور پر بات چیت ہونے کی امید ہے۔بالیندر شاہ کے اس دورے کو نیپال کے ساتھ ہندوستان اور بین الاقوامی میڈیا میں بھی خاص اہمیت دی جارہی ہے۔ تقریباً دس سال پہلے اعلیٰ تعلیم کے لیے بنگلورو آنے والے ایک نوجوان کا نیپال کا وزیر اعظم بن کر نئی دہلی پہنچنا ان کی زندگی اور سیاسی سفر کا ایک اہم پڑاؤ سمجھا جارہا ہے۔




