بنگلہ دیش کے وزیر اعظم طارق رحمان نے عوامی لیگ کے تشدد کےلئے بھارت کو ذمہ دار نہیں ٹھہرایا
ڈھاکہ، بنگلہ دیش کی وزارت خارجہ نے وزیر اعظم طارق رحمان کی 19 نومبر کو لال مونیرہاٹ میں کی گئی تقریر پر پیدا ہونے والے تنازعے کے
حوالے سے وضاحت جاری کی ہے۔ وزارت نے ہندوستانی میڈیا کے بعض اداروں کی خبروں کو مسترد کرتے ہوئے کہا ہے کہ وزیر اعظم نے پابندی کا سامنا کرنے والی عوامی لیگ کے تشدد کے لیے بھارت کو ذمہ دار نہیں ٹھہرایا تھا اور نہ ہی اپنی تقریر میں کسی ملک کا نام لیا تھا۔ڈھاکہ ٹریبیون کی رپورٹ کے مطابق، بنگلہ دیشی وزارت خارجہ کے ترجمان نے کہا کہ ہندوستانی میڈیا کے بعض اداروں نے وزیر اعظم کی تقریر کو غلط انداز میں پیش کیا ہے۔ ترجمان کے مطابق وزیر اعظم طارق رحمان نے اپنی تقریر میں کسی بھی ملک کا نام نہیں لیا تھا۔وزارت خارجہ کے ترجمان نے کہا کہ عوامی لیگ سے وابستہ فاشسٹ عناصر مختلف براعظموں میں بدامنی پھیلا رہے ہیں۔ پوری دنیا نے دیکھا ہے کہ ان عناصر نے کس طرح بے گناہ لوگوں کے خلاف خوفناک تشدد کیا ہے۔ٍترجمان نے الزام لگایا کہ اس تشدد کی وجہ سے کئی ممالک میں سلامتی سے متعلق مسائل پیدا ہورہے ہیں۔ اس کے علاوہ دوسرے ممالک میں بنگلہ دیش کی شبیہ بھی متاثر ہورہی ہے اور وہاں رہنے والے بنگلہ دیشی شہریوں کی ساکھ کو بھی نقصان پہنچ رہا ہے۔بنگلہ دیشی وزارت خارجہ کے ترجمان نے دیگر ممالک سے اپیل کی کہ وہ عوامی لیگ سے وابستہ عناصر کی جانب سے تشدد کے پھیلاؤ کو روکنے کے لیے ضروری اقدامات کریں۔وزارت نے ایک بار پھر واضح کیا کہ وزیر اعظم طارق رحمان کی لال مونیرہاٹ میں کی گئی تقریر میں بھارت سمیت کسی بھی ملک کو تشدد کا ذمہ دار نہیں ٹھہرایا گیا تھا۔ وزارت کے مطابق ہندوستانی میڈیا کی بعض خبروں میں تقریر کے اصل مفہوم کو درست طریقے سے پیش نہیں کیا گیا۔




