بہار میں چھٹھ کے دن تیز رفتار اسکارپیو کا قہر، سات افراد کو کچلا، دو نوجوانوں کی موت
بیتیا، ۔ بہار کے مغربی چمپارن ضلع کے بیتیا میں چھٹھ مہاپرَو کے دن تیز رفتار اسکارپیو گاڑی نے ایسا قہر برپا کیا کہ دو خاندانوں کی خوشیاں ماتم
میں تبدیل ہوگئیں۔ بے قابو اسکارپیو نے سڑک کنارے موجود سات افراد کو اپنی زد میں لے لیا، جس کے نتیجے میں دو نوجوانوں کی علاج کے دوران موت ہوگئی، جبکہ پانچ دیگر افراد زخمی ہوگئے۔یہ حادثہ مغربی چمپارن ضلع کے مجھولیا تھانہ علاقے کے تحت لال سرّیا چوک پر اتوار کی دیر شام پیش آیا۔ بتایا جاتا ہے کہ تیز رفتار اسکارپیو اچانک بے قابو ہوگئی اور سڑک کنارے موجود لوگوں کو کچلتے ہوئے آگے نکل گئی۔ حادثہ اتنا بھیانک تھا کہ موقع پر چیخ و پکار مچ گئی اور پورے چوک پر افراتفری کا ماحول پیدا ہوگیا۔
حادثے میں زخمی ہونے والوں کی شناخت لال سرّیا کے 48 سالہ اشوک چودھری، 41 سالہ لچھی نا چودھری، 12 سالہ آرادھیا کماری اور 7 سالہ انمول چودھری کے علاوہ 60 سالہ ونود چندر سنگھ، 26 سالہ محمد اسامہ اور 26 سالہ سونو عالم کے طور پر ہوئی ہے۔واقعے کے بعد مقامی لوگوں کی مدد سے تمام زخمیوں کو علاج کے لیے اسپتال پہنچایا گیا، جہاں دوران علاج محمد اسامہ اور سونو عالم نے دم توڑ دیا۔ دونوں متوفیوں کی شناخت بیتیا نگر تھانہ علاقے کے دوار دیوی چوک کے رہنے والے نیاز عالم کے 26 سالہ بیٹے محمد اسامہ اور محمد شعیب عالم کے 26 سالہ بیٹے سونو عالم کے طور پر ہوئی ہے۔اس حادثے نے دونوں خاندانوں کو گہرے صدمے سے دوچار کردیا ہے۔ بتایا جاتا ہے کہ محمد اسامہ کی شادی محض تین ماہ قبل ہوئی تھی، جبکہ گھر میں ان کی بہن کی شادی کی تیاریاں بھی جاری تھیں۔ خاندان میں شادی کی خوشیاں آنے والی تھیں، لیکن اس سے پہلے ہی دو دوستوں کی موت کی خبر نے دونوں گھروں کو ماتم میں تبدیل کردیا۔بیتیا صدر کے ایس ڈی پی او اجیت کمار نے بتایا کہ اس حادثے میں دو افراد کی موت ہوئی ہے، جبکہ پانچ دیگر زخمی ہیں۔ ابتدائی علاج کے بعد چار زخمیوں کو بہتر علاج کے لیے بیتیا جی ایم سی ایچ سے پٹنہ ریفر کیا گیا ہے۔ پولیس نے اسکارپیو کے ڈرائیور اور گاڑی میں سوار ایک دیگر شخص کو حراست میں لے کر پوچھ گچھ شروع کردی ہے۔




