والد کمل ہاسن سے تعریف کی امید نہیں رکھتیں شروتی ہاسن

ممبئی، اداکارہ اور گلوکارہ شروتی ہاسن نے اپنے والد اور معروف اداکار کمل ہاسن کے ساتھ رشتوں کے حوالے سے کھل کر بات کی ہے۔ شروتی ہاسن نے کہا کہ ان کے والد آسانی سے کسی سے متاثر نہیں ہوتے اور وہ ان سے تعریف یا ستائش کی امید بھی نہیں رکھتیں۔
نیہا دھوپیا اور انگد بیدی کے شو ‘ڈبل ڈیٹ میں گفتگو کے دوران شروتی نے بتایا کہ ان کے والد ایک عام ہندوستانی والد کی طرح ہیں، جنہیں 99 نمبر ملنے پر بھی ایک نمبر کم ہونے کی فکر رہتی ہے۔ اس دوران انہوں نے مزاحیہ انداز میں نیہا کو ‘ایول تھیراپسٹ بھی کہا۔شروتی نے بتایا کہ 19 سال کی عمر میں امریکہ میں موسیقی کی تعلیم کے لیے ان کے والد نے مالی مدد کی تھی۔ تاہم، گھر چھوڑ کر اپنی الگ پہچان بنانے کا فیصلہ کرنے کے بعد انہوں نے اپنی زندگی کی ذمہ داریاں خود اٹھائیں۔ انہوں نے کہا کہ ان کے والد نے انہیں تعلیم کے لیے ہمیشہ تعاون دیا، لیکن اپنی زندگی اپنے بل بوتے پر جینے کی نصیحت بھی کی۔