عہد ساز اداکارہ وسدا بہار اداکارہ کامنی کوشل

ممبئی، بالی وڈ فلم انڈسٹری میں 40 اور50 کی دہائی میں متعدد ایسی اداکارہ جلوہ گر ہوئیں، جنہوں نے طویل عرصے تک اپنی فنکارانہ عظمت کا سکہ جمائے رکھا۔کامنی کوشل بھی انہیں میں سے ایک تھیں اور اسی بنا پر انہیں عہد ساز اداکارہ کہا جاتا تھا۔کامنی کوشل کی پیدائش 24 فروری 1927کو لاہور میں ہوئی تھی۔ وہ دو بھائیوں اور تین بہنوں میں سب سے چھوٹی تھیں۔ ان کے والد پروفیسر شورام کشیپ پنجاب یونیورسٹی میں باٹنی کے پروفیسر تھے۔وہ اس دور کی مشہور شخصیت تھے اور انہیں انڈین باٹنی کا بابا آدم کہا جاتا ہے۔ جب وہ سات برس کی تھیں، تو ان کے والد کا سایہ سر سے اٹھ گیا ۔ کامنی کوشل نے کنیئرڈ کالج، لاہور سے انگریزی لٹریچر میں بی اے آنرز کیا۔ سال 1946ء میں انہیں چیتن آنند نے اپنی فلم نیچا نگر میں اداکاری کی پیش کش کی جسے انہوں نے قبول کرلیا اور انہیں اس فلم کے لئے کانس فلم فیسٹول میں ممتاز گولڈن پام ایوارڈ اور دوسری فلم براج بہو کے لیے بہترین اداکارہ کا فلم فیئر ایوارڈ ملا۔نوعمر ی سے ہی وہ تیراکی ، گھڑ سواری اور آکاش وانی پر ریڈیو ڈرامے کرتی رہیں اور انہیں فی ڈرامہ دس روپے ملتے تھے ۔ کالج کے زمانے میں وہ اشوک کمار کی بڑی مداح تھیں۔ نیچا نگرمیں ان کی پرفارمنس کو کافی پسند کیا گیا۔ ان کا اصل نام اوما کشیپ تھا، لیکن چیتن آنند نے انہیں مشورہ دیا کہ وہ اپنا نام بدل لیں اور یوں وہ اوما سے کامنی کوشل بن گئیں۔ ایسا کم ہی دیکھا گیا ہے کہ کسی فلم میں اداکارہ کا نام ہیرو کے نام سے پہلے آئے لیکن 40کی دہائی میں کامنی کوشل کی فلموں میں ان کا نام ہیرو سے پہلے آتا تھا۔ قابل ذکر ہے کہ 1942-45 میں وہ دہلی میں اسٹیج ایکٹریس کے طور پر بھی کام کرتی رہیں۔
سال 1947ء میں اچانک کامنی کوشل کی شادی ہوگئی۔ یہ بھی ایک الگ کہانی ہے۔ ہوا یوں کہ کامنی کوشل کی بڑی بہن کا ایک کار حادثے میں انتقال ہوگیا، ان کی دو بیٹیاں تھیں۔ کامنی کوشل کو اپنی بھانجیوں کی نگہداشت کیلئے اپنے بہنوئی بی ایس سود سے شادی کرنی پڑی۔ بی ایس سود بامبے پورٹ ٹرسٹ میں چیف انجینئر تھے۔1948ء میں کامنی کوشل ممبئی منتقل ہوگئیں۔
وہ ہندی فلموں کی پہلی ہیروئن ہیں، جو شادی کے بعد مرکزی کردار ادا کرتی رہیں اور انہیں مسلسل پذیرائی ملتی رہی۔ شادی ان کے فلمی کریئر پر کبھی اثرانداز نہیں ہوئی۔ ان کے علاوہ جن ہیروئنوں کو شادی کے بعد بھی کامیابی ملتی رہی، ان میں مالا سنہا، شرمیلا ٹیگور، وجنتی مالا، سروجا دیوی اور موسمی چٹرجی شامل ہیں۔کامنی کوشل حسین تھیں اور پھر فطری اداکاری میں بھی ان کا کوئی جواب نہیں تھا۔ وہ رومانوی اور المیہ کرداروں میں اپنی چھاپ چھوڑ جاتی تھیں۔ انہوں نے اشوک کمار، راج کپور، دیو آنند اور دلیپ کمار کے ساتھ مرکزی کردار نبھائے۔
دلیپ کمار کے ساتھ ان کی جوڑی کو بہت پسند کیا گیا۔1948ء میں دلیپ کمار کے ساتھ انہوں نے فلم شہی میں کام کیا، جو سپرہٹ ثابت ہوئی۔ اس کے بعد انہوں نے پگڑی، ندیا کے پار، شبنم اور آرزو میں بھی دلیپ کمار کے ساتھ ہیروئن کی حیثیت سے کام کیا اور یہ سب فلمیں کامیابی سے ہمکنار ہوئیں۔1948 ء میں انہوں نے عصمت چغتائی کے ناول ضدی پر مبنی فلم ضدی میں آشا کا کردار ادا کیا جبکہ ہیرو کا کردار دیو آنند نے نبھایا تھا۔ یہ دیو آنند کی پہلی کامیاب فلم تھی، پھر انہوں نے فلم نمونہ میں دیو آنند کے ساتھ کام کیا۔ 1948ء میں وہ راج کپور کی فلم آگمیں مہمان اداکارہ کے طور پر نظر آ ئیں۔
کامنی کوشل کو یہ اعزاز بھی حاصل ہے کہ لتا منگیشکر کا جو پہلا پلے بیک گیت کسی ہیروئن پر پکچرائز ہوا وہ یہی ہیروئن تھیں۔ اس سے پہلے لتا معاون اداکاراؤں کیلئے گایا کرتی تھیں۔ کامنی کوشل کیلئے زیادہ تر پلے بیک گیت شمشاد بیگم اور سریندر کور گایا کرتی تھیں۔
کامنی کوشل کی دیگر فلموں میں دو بھائی (1947)، شہید (1948)، ضدی (1948)، ندیا کے پار (1948) ، نائٹ کلب (1958)وارث، یقین، آدمی اور انسان، گمراہ،اپہار، قید، گئودان، آبرو، شور، ٹانگے والا، ہیرا لال پنا لال، روٹی کپڑا اور مکان اور دس نمبری،دو راستے (1969)، پریم نگر (1974)، مہا چور (1976) اور شامل ہیں۔ منشی پریم چند کے ناول پر مبنی فلم گئودان (1963) میں ان کی اداکاری کو اُن کے کیریئر کی بہترین پرفارمنس میں شمار کیا جاتا ہے۔
انہوں نے 1946 سے 1963 تک فلموں میں بطور مرکزی اداکارہ کام کیا۔ کامنی کوشل نے 1963 کے بعدمرکزی کردار کی جگہ معاون اداکارہ کے کردار ادا کرنے شروع کر دیے۔ ان کرداروں میں بھی کامنی کوشل کو شاندار کامیابی ملی۔ بطور کریکٹر ایکٹر شہید (1965) میں ادا کیا گیا ان کے کردار کی نقادوں نے کافی ستائش کی ۔ یہ فلم بھگت سنگھ اور ان کے ساتھیوں پر بنائی گئی تھی۔ اس فلم کا ایک گیتمیرا رنگ دے بسنتی چولابے حد مشہور ہوا تھا ۔اس فلم میں کامنی کوشل نے انتہائی متاثر کن اداکاری کی۔ سال 1973 کی فلم انہونی میں انہوں نے منفی کردار ادا کرکے سب کو حیران کر دیا تھا۔ اس کے بعد بھی انہیں کریکٹرایکٹر کے طور پر متعدد فلموں میں کاسٹ کیا گیا۔ انہوں نے منوج کمار کی آٹھ فلموں میں ماں کا کردار ادا کیا۔ منوج کمار کا نام ہر فلم میں بھارت ہوتا تھا۔ اسی طرح وہ بھارت کی ماں کے طورپر مشہور ہو گئیں۔
وہ بالی وڈ کی سب سے عمر رسیدہ اداکارہ تھیں اور اپنی زندگی میں سنچری مکمل کرنے سے محض 2 سال دور تھیں۔ انہوں نے راجیش کھنہ کے ساتھ بھی چار فلموں میں اداکاری کی۔قسمت کے کھیل بھی نرالے ہوتے ہیں۔ دلیپ کمارکے ویسے تو کئی اداکاراؤں کے ساتھ رومانس کے قصے مشہور ہوئے، لیکن ان کی پہلی محبت کامنی کوشل تھیں۔ انہوں نے اپنی خود نوشت (Shadow and substance) میں اس بات کا اعتراف کیا ہے کہ کامنی ان کی پہلی محبت تھیں۔کامنی کوشل کو اس وجہ سے عہد ساز اداکارہ کہا جاتا ہے کہ ان کے بعد شادی شدہ اداکاراؤں کو اپنا کریئر جاری رکھنے میں مدد ملی۔ اس کے علاوہ انہوں نے یہ بھی ثابت کیا کہ ضروری نہیں کہ صرف ہیروئن کے طور پر اپنے آپ کو منوایا جائے۔ کیریکٹر ایکٹر کے طور پر بھی اپنی صلاحیتوں کے جوہردکھائے جاسکتے ہیں۔
سال 1994ء میں انہوں نے مقبول سیریل جیوئل ان دی کراؤن میں بھی اداکاری کے جوہر دکھائے ۔ ایک وقت ایسا آیا جب کامنی کوشل نے اداکاری سے وقفہ لے لیا اور وہ آل انڈیا ریڈیو اور ٹیلی ویژن کے ساتھ بچوں کے لیے کٹھ پتلی اور کہانیوں کے پروگرام بنانے لگیں۔بعد میں وہ بچوں کے پروگرامز میں خاصی دلچسپی لینے لگی تھیں۔بچوں کے لیے ان کے پروگرام کی سیریز چاند ستارے کو دوردرشن پر نشر کیا گیا اور ان کی بچوں کی کہانیاں پراگ نامی میگزن میں شائع ہوئیں۔ 2015میں فلم فیئر کی جانب سے انھیں لائف ٹائم اچیومنٹ ایوارڈ دیا گیا ہے۔
تقریباً سات دہائیوں تک اپنے فن کے جلوے بکھیرنے والی اداکارہ کامنی کوشل نے نے 14 نومبر 2025 کو داعی اجل کو لبیک کہا۔ ایک بے مثال اداکارہ کی حیثیت سے ان کا نام ہندی فلموں کی تاریخ میں امر ہوگیا ہے،اگرچہ ان کے انتقال سے ہندی سنیما کے ایک شاندار دور کا خاتمہ ہوگیا لیکن ان کی بھرپور اداکاری اور فلمی سفر کو ہمیشہ یاد رکھا جائے گا۔