ارریہ میں پیسوں کے تنازع پر دوست نے دوست کو گولی مار کر قتل کردیا

ارریہ، ارریہ زیرو مائل کے قریب جمعہ کی دیر رات پیسوں کے لین دین کے تنازع میں ایک نوجوان نے اپنے ہی دوست کو گولی مار کر قتل کردیا۔ مقتول کی شناخت جوکی ہاٹ تھانہ علاقے کے سکٹیا باشندہ 25 سالہ منگل کمار کے طور پر ہوئی ہے۔ وہ گٹی اور بالو کے کاروبار سے وابستہ تھا۔ پولیس نے ملزم دوست محمد ا صغرکو گرفتار کرلیا ہے۔مقامی لوگوں کے مطابق منگل کمار اور محمد اصغر گٹی اور بالو کے کاروبار میں شراکت دار تھے۔ دونوں کے درمیان گزشتہ کچھ عرصے سے پیسوں کے لین دین کو لے کر تنازع چل رہا تھا۔ اس معاملے کو سلجھانے کے لیے دونوں زیرو مائل واقع ایک پٹرول پمپ کے قریب بریانی کی دکان پر بیٹھے تھے۔ اسی دوران رقم کی لین دین کو لے کر دونوں کے درمیان بحث شروع ہوگئی، جو دیکھتے ہی دیکھتے شدت اختیار کرگئی۔بتایا جاتا ہے کہ تنازع بڑھنے پر محمد اصغر نے پستول نکال کر منگل کمار کے سر میں گولی مار دی۔ گولی لگتے ہی منگل خون میں لت پت ہوکر زمین پر گر پڑا۔ اسے فوری طور پر علاج کے لیے صدر اسپتال لے جایا گیا، جہاں ڈاکٹروں نے اسے مردہ قرار دے دیا۔گولی کی آواز سن کر موقع پر لوگوں کی بھیڑ جمع ہوگئی۔ مشتعل لوگوں نے ملزم اصغر کو پکڑ لیا اور اس کی کر پٹائی کردی، جس سے وہ بھی زخمی ہوگیا۔ اطلاع ملتے ہی ایس ڈی پی او سشیل کمار اور نگر تھانہ انچارج منیش کمار رجک پولیس فورس کے ساتھ موقع پر پہنچے اور ملزم کو بھیڑ کے قبضے سے نکال کر گرفتار کرلیا۔ پولیس نے جائے وقوع سے واردات میں استعمال ہونے والی پستول اور کارتوس کا خالی کھوکھا بھی برآمد کیا۔ بعد ازاں لاش کو پوسٹ مارٹم کے لیے صدر اسپتال بھیج دیا گیا۔ایس پی جتیندر کمار نے بتایا کہ مقتول اور ملزم گٹی و بالو کے کاروبار میں شراکت دار تھے اور دونوں کے درمیان پیسوں کے لین دین کو لے کر تنازع تھا۔ پولیس نے ملزم کو گرفتار کرنے کے ساتھ قتل میں استعمال ہونے والی پستول بھی برآمد کرلی ہے۔ معاملے کی مزید تفتیش اور قانونی کارروائی جاری ہے۔