متوازی و کامرشیل فلموں میں ناظرین کے درمیان خاص مقام بنانے والی ادارہ اسمیتا پاٹل

ممبئی، ہندوستانی سنیما کی اسٹار اداکارہ سمیتا پاٹل نے اپنی بہترین ادکاری سے متوازی فلموں کے ساتھ ساتھ کمرشیل فلموں میں ناظرین کے درمیان اپنا خاص مقام بنایا۔
سمیتا پاٹل کی پیدائش 17 اکتوبر 1955 کو پونے شہر میں ہوئی تھی۔ انہوں نے مہاراشٹر سے تعلیم مکمل کی۔ ان کے والد شیواجی رائے پاٹل مہاراشٹر حکومت میں وزیرتھے جبکہ ان کی والدہ سماجی کارکن تھیں۔ کالج کی تعلیم مکمل کرنے کے بعد وہ مراٹھی ٹیلی ویژن میں بطور نیوز ریڈر کام کرنے لگی تھیں۔ اس دوران ان کی ملاقات معروف ڈائرکٹر اور ہدایت کار شیام بینگیل سے ہوئی۔
شیام بینگل ان دنوں اپنی فلم ‘ چرن داس چور بنانے کی تیاری کررہے تھے۔ شیام بینگل کو سمیتا پاٹل میں ایک ابھرتی ہوئی اداکارہ نظر آئی اور انہوں نے اپنی فلم ‘چرن داس چورمیں انہیں ایک چھوٹا سا رول دیا۔ منتھن اور بھومیکا میں سیمتا کے ساتھ نصیرالدین شاہ، شبانہ اعظمی ، امول پالیکر اور امریش پوری جیسے مشہور اداکار ساتھ تھے۔فلم بھومیکا سے سمیتا پاٹل کا جو سفر شروع ہوا وہ چکر، نشانت ، آکروش ، گدھ، البرٹ پنٹو کو غصہ کیوں آتا ہے اور مرچ مسالہ جیسی فلموں تک جاری رہا۔سال 1980 میں ریلیز فلم ‘چکر میں سمیتا پاٹل نے جھگی میں رہنے والی خاتون کا کردار ادا کیا جس کے لئے انہیں دوسری مرتبہ قومی ایوارڈ سے سرفراز کیا گیا ۔سْمِتا پاٹل نے کئی خواتین پر مبنی فلموں میں کام کیا ہے اور فیمینزم کا پرچم بلند کیا ہے۔ تاہم یہ صرف فلموں میں ہی نہیں تھا، بلکہ حقیقی زندگی میں بھی سمِیتا ایک مضبوط فیمینسٹ تھیں۔ وہ ممبئی کے ‘مہلا کِندَر’کی رکن بھی تھیں۔ یہاں تک کہ انہوں نے اپنے پہلے نیشنل ایوارڈ سے ملنے والی پوری رقم بھی عطیہ کر دی تھی۔اسی کی دہائی میں سمیتا پاٹل نے کمرشیل فلموں کا رخ کیا اور اس دوران انہوں نے سپراسٹار امیتابھ بچن کے ساتھ ‘نمک حلال اور ‘شکتی ‘ جیسی سپرہٹ فلموں میں کام کیا جس کے بعد انہیں کمرشیل فلموں میں بھی کامیابی حاصل ہوئی ۔سال 1985 میں ہندوستانی سنیما میں انہیں شاندار اداکاری کے سبب پدم شری ایوارڈ سے نوازا گیا۔ ہندی فلموں کے علاوہ سمیتا نے مراٹھی، گجراتی،تیلگو، بنگلہ، کنڑ اور ملیالم فلموں میں بھی اداکاری کے جوہر دکھائے۔اس کے علاوہ سمیتا کو عظیم فلمکار ستیہ جیت رے کے ساتھ بھی کام کرنے کا موقع ملا۔ منشی پریم چندر کی کہانی پر مبنی ٹیلی فلم ‘سدگتی ‘ کو آج بھی یاد کیا جاتا ہے۔سمیتا پاٹل کی نجی زندگی کافی ہلچل بھری رہی۔ انہیں ایک ایسے شخص سے محبت ہوئی جو پہلے سے شادیشُدہ تھا۔ راج ببر کے ساتھ سمیتا کے تعلق نے بہت زیادہ توجہ حاصل کی۔ راج نے سمیتا کے لیے اپنی پہلی بیوی کو چھوڑ دیا تھا اور وہ سمیتا کے ساتھ لِو-اِن میں بھی رہنے لگے تھے۔ راج کے ساتھ اس رشتے میں رہنے کی وجہ سے سمیتا کو شدید تنقید کا سامنا کرنا پڑا۔ حتیٰ کہ انہیں ‘گھر توڑنے والیخاتون تک کہا گیا۔راج ببر سے شادی کے بعد سال 28 نومبر 1986 کو ان کے بیٹے پرتیک کی پیدائش ہوئی۔ اس کے بعد ان کی طبیعت خراب رہنے لگی۔ ان کی بہن کا خیال تھا کہ بیٹے کی پیدائش کے بعد انھیں وائرل انفیکشن ہو گیا۔ کچھ لوگوں نے کہا کہ وہ گردن توڑ بخار کی گرفت میں آ گئی تھی۔ ایک ایک کر کے ان کے تمام اعضا نے کام کرنا چھوڑ دیا۔ اپنی بہترین ادکاری سے دودہائی تک ناظرین کے دلوں میں چھانے والی ادکارہ نے محض 31 برس کی عمر میں 13 دسمبر 1986 کو وہ اس دار فانی کو الوداع کہہ گئیں۔ ان کے انتقال کے بعد سال 1988 میں ان کی فلم وارث ریلیز ہوئی جو مقبولیت سے ہمکنار ہوئی۔