گھروں اور اداروں سے نکلنے والے کچرے کو الگ رکھنا شہریوں کی ذمہ داری: نائب سنگھ سینی

گروگرام،  ہریانہ کے وزیر اعلیٰ نائب سنگھ سینی نے کہا ہے کہ صفائی کو صرف سرکاری نظام تک محدود رکھنے کے بجائے اس میں شہریوں کی شمولیت کو یقینی بنانا ضروری ہے۔ حکومت انتظامات اور سہولیات فراہم کرنے کے ساتھ جدید ٹیکنالوجی اور وسائل کا استعمال کرسکتی ہے، لیکن گھروں ا

ور اداروں سے نکلنے والے کچرے کو الگ الگ رکھنا ہر شہری کی ذمہ داری ہے۔
وزیر اعلیٰ نے یہ بات جمعہ کو ’سیوا سنکلپ‘ مہم کے تحت بابائے قوم مہاتما گاندھی کی جینتی کے موقع پر کہی۔ وہ مہرولی روڈ پر واقع کچرا حساس مقام (گاربیج ورنریبل پوائنٹ۔ جی وی پی) سے پاک مقام کا معائنہ کرنے پہنچے تھے۔ اس دوران انہوں نے صفائی ملازمین سے بات چیت کی اور صفائی سے متعلق نکڑ ناٹک بھی دیکھا۔ پروگرام میں صفائی کا عہد بھی دلایا گیا۔وزیر اعلیٰ نے میونسپل کارپوریشن گروگرام کی جانب سے تیار کیے گئے جی وی پی سے پاک مقام کا معائنہ کرکے مہم کا آغاز کیا۔ انہوں نے سرکاری انتظامات، جدید ٹیکنالوجی اور عوامی شراکت داری کو صفائی مہم کے تین اہم پہلو قرار دیا۔ انہوں نے کہا کہ اس مہم کا مقصد صفائی کی کوششوں کو عوامی شراکت داری کے ذریعے ایک وسیع شہری مہم کی شکل دینا ہے۔نائب سنگھ سینی نے شہریوں سے اپیل کی کہ وہ کھلے میں کچرا نہ پھینکیں، گھروں میں کچرے کو الگ الگ رکھیں اور صرف مجاز کچرا گاڑی کے حوالے کریں۔
انہوں نے کہا کہ جی وی پی سے پاک مہم کا مقصد صرف ایک مرتبہ صفائی کرنا نہیں ہے بلکہ یہ بھی یقینی بنانا ہے کہ نشان زدہ مقامات پر دوبارہ کچرا جمع نہ ہو۔ اس کے لیے شہریوں میں ذمہ دارانہ رویے کو فروغ دینا ضروری ہے۔میونسپل کارپوریشن کی جانب سے شروع کی گئی یہ مہم 2 سے 11 اکتوبر تک جاری رہے گی۔ مہم کا پیغام ’10 دن، 21 کچرا مقامات، ایک گروگرام‘ رکھا گیا ہے۔ وزیر اعلیٰ نے شہریوں سے بھی مہم میں شامل ہونے اور اپنے علاقوں میں جی وی پی کو صاف رکھنے کے لیے شرمدان اور تعاون کرنے کی اپیل کی۔مہم کے پروگرام کے مطابق 2 اکتوبر کو ڈی ایچ بی وی این کالونی کے قریب اور سرہول میں صفائی مہم کا آغاز کیا گیا۔ اس کے بعد 3 اکتوبر کو ٹکری اور سیکٹر 18، 4 اکتوبر کو اربانا مال اور سبھاش چوک، 5 اکتوبر کو پیس سٹی-1 اور گؤشالہ میدان، جبکہ 6 اکتوبر کو پیس سٹی اور سنگھا چوک میں خصوصی صفائی سرگرمیاں انجام دی جائیں گی۔اسی طرح 7 سے 11 اکتوبر تک کرشنا کالونی، میگاپولس مال کے قریب، انڈین گیس کے نزدیک، گھاٹا، بنجارہ مارکیٹ، سیکٹر 37، محمد ہیڑی روڈ، دولت آباد روڈ، سیکٹر 39 اور الّہواس سمیت دیگر نشان زدہ مقامات پر صفائی مہم چلائی جائے گی۔