شمالی اور وسطی علاقوں میں شدید بارش کا امکان، دہلی میں موسم خوشگوار رہے گا
نئی دہلی، بھارتی محکمہ موسمیات (آئی ایم ڈی) نے ملک کے کئی حصوں، خاص طور پر شمالی اور وسطی ہندوستان میں شدید بارش اور تیز ہواؤں کا الرٹ جاری کیا ہے۔ وہیں قومی راجدھانی دہلی میں اتوار اور پیر کو جزوی طور پر بادل چھائے رہنے کا امکان ہے۔آئی ایم ڈی کی پیش گوئی کے مطابق اتوار اور پیر (27 تا 28 ستمبر) کو جزوی طور پر بادل چھائے رہیں گے۔ وہیں 29 ستمبر کی صبح بعض مقامات پر ہلکی بارش ہوسکتی ہے۔ اس دن زیادہ سے زیادہ درجہ حرارت بڑھ کر 32 سے 34 ڈگری سیلسیس اور کم سے کم درجہ حرارت 21 سے 23 ڈگری سیلسیس کے درمیان رہنے کا امکان ہے۔ محکمہ موسمیات نے بتایا کہ پیش گوئی کے مطابق ہفتہ کو نئی دہلی میں دن بھر بادل چھائے رہے اور دوپہر سے شام کے درمیان بوندا باندی ہوئی۔محکمہ موسمیات نے بتایا کہ شمال مشرقی مدھیہ پردیش اور شمالی چھتیس گڑھ کے اوپر بنا ہوا دباو 13 کلومیٹر فی گھنٹہ کی رفتار سے شمال اور شمال مغرب کی جانب بڑھا ہے۔ جنوب مغربی مانسون کی واپسی کی لکیر اب گرداسپور، چندی گڑھ، مظفر نگر، علی گڑھ، دھولپور، ادے پور اور نلیا سے ہوکر گزر رہی ہے۔ دباو کے اثر سے 27 ستمبر کو اتراکھنڈ کے کئی حصوں میں بہت شدید بارش کی وارننگ جاری کی گئی ہے۔ ہماچل پردیش، ہریانہ اور چنڈی گڑھ میں بھی ہفتے کے آخر میں موسلا دھار بارش اور گرج چمک کے ساتھ 40 سے 60 کلومیٹر فی گھنٹہ کی رفتار سے تیز ہوائیں چلنے کا امکان ہے۔جنوبی ہندوستان میں 28 سے 30 ستمبر کے درمیان کیرالہ، ساحلی و جنوبی اندرونی کرناٹک اور لکشدیپ میں وسیع پیمانے پر بارش کا امکان ہے۔ اس دوران تمل ناڈو اور پڈوچیری میں گرج چمک کے ساتھ 40 سے 50 کلومیٹر فی گھنٹہ کی رفتار سے ہوائیں چلیں گی۔مغربی ہندوستان کے وسطی مہاراشٹر، کونکن، گوا اور مراٹھواڑہ میں 26 ستمبر سے 2 اکتوبر کے درمیان کہیں کہیں سے لے کر وسیع پیمانے پر بارش ہوسکتی ہے۔ 28 سے 30 ستمبر کے درمیان مہاراشٹر کے کئی حصوں میں تیز آندھی کا الرٹ ہے۔شمال مشرقی ہندوستان کے آسام، میگھالیہ، ناگالینڈ، منی پور، میزورم اور تریپورہ میں 27 ستمبر کو آندھی اور طوفان کے ساتھ بارش کا امکان ہے۔ 29 اور 30 ستمبرکو آسام اور میگھالیہ میں شدید بارش ہوسکتی ہے۔ وہیں شمال مشرقی مدھیہ پردیش، جنوب مشرقی اتر پردیش، شمالی چھتیس گڑھ، جنوب مغربی جھارکھنڈ اور جنوبی بہار میں 40 سے 50 کلومیٹر فی گھنٹہ کی رفتار سے تیز ہوائیں چلنے کا سلسلہ جاری ہے۔
