ملک سے منشیات کے کاروبار کو جڑ سے اکھاڑ پھینکنے کا ہدف: امت شاہ

نئی دہلی، ۔مرکزی وزیر داخلہ و امداد باہمی امت شاہ نے منگل کے روز کہا کہ ہندوستان نے 31 دسمبر 2029 تک ملک سے منشیات کے کاروبار کو اجتماعی کوششوں سے جڑ سے اکھاڑ پھینکنے کا ہدف مقررکیا ہے اور اس کے لیے تمام ریاستوں اورمرکزکے زیرانتظام علاقوں کو متحد ہو کر فیصلہ کن کارروائی کرنی ہوگی۔
شاہ نے یہاں انسدادِ منشیات ٹاسک فورس (اے این ٹی ایف) کے سربراہوں کی تیسری قومی کانفرنس کا افتتاح کرتے ہوئے کہا کہ منشیات کے خلاف مہم میں محض ضبطی پر توجہ دینے کے بجائے پورے نیٹ ورک کو منہدم کرنے پر زور دیا جانا چاہیے۔ انہوں نے کہا کہ اس لڑائی میں ہدف، وقت کی حد اور جواب دہی واضح ہونی چاہیے۔ انہوں نے کہا کہ منشیات کے کاروبار سے نمٹنے کے لیے ’میٹنگ سے مشن‘، ’رپورٹنگ سے نتائج‘، ’ضبطی سے نیٹ ورک کے خاتمے‘ اور ’کیس سے سزا دہی‘ کی سمت میں آگے بڑھنا ہوگا۔ انہوں نے اے این ٹی ایف کو ’اینٹی نارکو مشن کمانڈ‘ کے طور پر تیار کرنے پر بھی زور دیا۔
شاہ نے کہا کہ ضلع کو منشیات کے خلاف کارروائی کی بنیادی اکائی بنایا جانا چاہیے۔ اس کے تحت اضلاع کو منشیات کی پیداوار اور داخلے والے علاقوں، ترسیلی راہداریوں اور استعمال والے علاقوں کے تین زمروں میں تقسیم کر کے کارروائی کی جائے گی۔ انہوں نے منشیات کے نیٹ ورک کو تباہ کرنے کے لیے مالی اور ڈیجیٹل تفتیش کو بھی ترجیح دینے کی بات کہی۔وزیر داخلہ نے کہا کہ بیرون ملک سے منشیات کی سپلائی کرنے والے مفرور ملزمین کو پکڑ کر ہندوستانی عدالتوں کے روبرو لایا جائے گا نیز غیر ملکی ملزمین کو ملک بدر کرنے اور انہیں بلیک لسٹ کرنے کی سمت میں بھی کارروائی کی جائے گی۔ انہوں نے کہا کہ منشیات کے خلاف مہم میں نوجوانوں کا کردار کلیدی ہے۔ ’نشہ مکت متر‘ مہم کے تحت ملک کے 10 لاکھ اسکولوں، کالجوں اور دیگر اداروں تک پہنچنے کا ہدف رکھا گیا ہے۔ اب تک 46,780 ’نشہ مکت متر‘ درج کیے جا چکے ہیں۔
شاہ نے کہا کہ منشیات کے کاروبار کے بدلتے ہوئے چیلنجز میں سنتھیٹک ڈرگز، کیمیائی مواد کا غلط استعمال، ڈارک نیٹ، کرپٹو کرنسی، رابطے کے نئے ذرائع اور بین الاقوامی نیٹ ورک شامل ہیں۔ ان سے نمٹنے کے لیے تفتیشی اور نفاذ کرنے والی ایجنسیوں کو نئی تکنیک اور نئے طریقۂ کار کو اپنانا ہوگا۔اس موقع پر شاہ نے منشیات مخالف بیداری سے متعلق ٹیلی ویژن اشتہارات اور نارکوٹکس کنٹرول بیورو (این سی بی) کی ویب سائٹ کا افتتاح کیا۔ انہوں نے لکھنو اور دہرادون میں این سی بی کے علاقائی کیمپسوں کا سنگ بنیاد بھی رکھا نیز بہتر کارکردگی کا مظاہرہ کرنے والے اے این ٹی ایف کو اعزاز سے نوازا۔ کانفرنس میں ریاستوں اور مرکز کے زیر انتظام علاقوں کے 36 اے این ٹی ایف سربراہان شریک ہوئے۔کانفرنس میں ’ویژن ڈاکیومنٹ 2029-2026‘ پر بھی تبادلہ خیال ہوا، جس میں منشیات کے خلاف کارروائی کے لیے اہداف اور وقت کی حد مقرر کی گئی ہے۔ شاہ نے کہا کہ منشیات کے خلاف جنگ کو حکومت کی تمام سطحوں اور متعلقہ ایجنسیوں کی باہمی رابطہ کاری پر مبنی کوششوں سے آگے بڑھانا ہوگا۔