ویدک علم اور سائنس ایک دوسرے کے مخالف نہیں ہیں: لوک سبھا اسپیکر

نئی دہلی؛ اپریل ۔لوک سبھا کے اسپیکر اوم برلا نے آج نئی دہلی میں آل انڈیا ویدک سائنس کانفرنس کا افتتاح کیا۔ اس موقع پر مرکزی زراعت اور کسانوں کی بہبود کے وزیر نریندر سنگھ تومر موجود تھے۔کانفرنس کو خطاب کرتے ہوئے مسٹر برلا نے کہا کہ ویدوں نے ہمارے عظیم بزرگوں کی حکمت کے ایک شاندار سنگم کی شکل میں زمانہ قدیم سے دنیا کی رہنمائی کی ہے۔ ویدوں نے انسانیت کو سچائی، انصاف اور اخلاقیات پر مبنی بامقصد زندگی گزارنے کا راستہ دکھایا ہے۔ مسٹر برلا نے مزید کہا کہ مختلف ادوار میں ویدوں پر وسیع تحقیق کی گئی ہے اور ہر بار یہ ثابت ہوا ہے کہ ویدوں میں جو کہا گیا ہے وہ سچ ہے۔ لوک سبھا کے اسپیکر نے زور دے کر کہا کہ وید ہمارے ہر تجسس کا جواب دیتے ہیں اور انسانیت کو درپیش چیلنجوں کا حل بھی فراہم کرتے ہیں۔ انہوں نے کہا کہ ویدوں سے حاصل کردہ سمت، علم اور غور و فکر پوری مخلوق کے لیے فائدہ مند ہے۔ویدوں کے سائنسی پہلوؤں کا ذکر کرتے ہوئے لوک سبھا کے اسپیکر نے کہا کہ وید اور سائنس ایک دوسرے کے مخالف نہیں ہیں۔ ویدوں میں ایسا علم ہے جو بہت سائنسی اور انسانیت کے لیے انتہائی مفید ہے۔ وید صرف صحیفہ نہیں ہے، بلکہ وہ ہماری ثقافت اور ہمارے طرز زندگی کا حصہ ہے اور یہ ہماری ذمہ داری ہے کہ علم کے اس سمندر کو ہر شخص تک پہنچایا جائے تاکہ لوگ اس سے استفادہ کرسکیں۔ہندوستانی جمہوریت کا ذکر کرتے ہوئے مسٹر برلا نے کہا کہ ہندوستان جمہوریت کی ماں ہے اور ہماری جمہوری جڑیں ویدوں سے نکلی ہیں۔ قدیم ویدوں کے بارے میں ہمارا علم اور جمہوری طرز زندگی ہماری طاقت ہے اور یہ مل کر ہماری تہذیب کو ترقی کی راہ پر گامزن کرتے رہیں گے۔