راکھی ساونت کا عادل درانی سے طلاق لینے کا فیصلہ

ممبئی،مارچ۔بھارتی اداکارہ، ڈانسر و ماڈل راکھی ساونت نے اپنے شوہر عادل درانی سے طلاق لینے کا فیصلہ کر لیا ہے۔حال ہی میں اسلام قبول کرنے والی اداکارہ راکھی ساونت آج کل روزے رکھ رہی ہیں اور سوشل میڈیا پر کافی متحرک اور مزید مشہور ہو رہی ہیں۔راکھی ساونت نے گزشتہ روز میڈیا سے بات کرتے ہوئے انکشاف کیا ہے کہ وہ اپنے شوہر عادل درانی سے طلاق لینے والی ہیں۔راکھی نے میڈیا کو انٹرویو دیتے ہوئے پوچھے گئے ایک سوال کے جواب میں بتایا کہ اْن کی خوشی کا راز یہ ہے کہ وہ طلاق لینے والی ہیں اور اب وہ آزاد ہیں۔اس دوران انہوں نے اپنے آنے والے متعدد نئے پروجیکٹس سے متعلق بھی بات کی۔واضح رہے کہ راکھی ساونت اور عادل درانی میں گزشتہ ماہ علیحدگی ہو گئی تھی۔راکھی نے عادل خان درانی سے 8 ماہ قبل شادی کی تھی، اس خفیہ شادی کے منظرِ عام پر آتے ہی اس جوڑی میں علیحدگی کی افواہیں بھی پھیل گئی تھیں جن کی راکھی نے گزشتہ ماہ تصدیق کی تھی۔