جب عمران ہاشمی نے ایشوریا کو ‘پلاسٹک’کہنے پر معافی مانگی

ممبئی،نومبر۔بالی وڈ کے رومانوی ہیرو عمران ہاشمی نے ماضی میں سابقہ ملکہ حسن اداکارہ ایشوریا رائے کو ‘پلاسٹک’ کہنے پر معافی مانگی تھی۔2014 میں بھارت کے متنازع شو ‘کافی وِد کرن’ کے چوتھے سیزن کی ایک قسط میں عمران ہاشمی مہمان بنے۔دوران پروگرام اداکار سے میزبان کرن جوہر نے سوال کیا کہ ‘پلاسٹک’ کا خطاب انڈسٹری میں کس کو دیں گے؟کرن جوہر نے سوال کا جواب دینے پر کافی اصرار کیا جس کے بعد عمران ہاشمی نے ایشوریا رائے بچن کو ‘پلاسٹک’ کہا۔بعدازاں اس بات کو کافی اچھالا گیا اور ایشوریا کے چاہنے والوں نے عمران پر سخت تنقید کی اور ان کے اس بیان کو غیر مناسب قرار دیا۔2014 میں ہی اداکار نے ہندوستان ٹائمز کو دیے گئے ایک انٹرویو میں ایشوریا کو پلاسٹک کہنے پر معافی مانگی۔انہوں نے کہا ‘میرا مطلب وہ نہیں تھا جو لوگوں نے لیا، میں ایشوریا کو بے حد پسند کرتا ہوں، شو کا فارمیٹ ایسا تھا اگر میں جواب نہیں دیتا تو مجھے گفٹ ہیمپر نا ملتا، میں ہمیشہ سے ہی ایشوریا کے کام کو سراہتا آیا ہوں’۔عمران ہاشمی نے یہ بھی کہا تھا کہ ‘لوگ ہمیشہ بے بنیاد باتوں کو اچھالتے ہیں، مجھے ان سے کوئی غرض نہیں’۔بعدازاں اپنے ایک اور انٹرویو میں اداکار نے پلاسٹک کہنے کا الزام میزبان کرن جوہر پر عائد کیا تھا، انہوں نے کہا ‘کرن مہمانوں کو زبردستی اس قسم کے متنازع بیانات دینے پر زور دیتے ہیں’۔خیال رہے کہ ایک اور میڈیا رپورٹ میں دعویٰ کیا گیا تھا کہ ایشوریا نے 2019 میں عمران ہاشمی کے ساتھ فلم کرنے سے انکار کردیا تھا۔