وزیر اعظم مودی نے موسیقار گورانگ ویاس کے انتقال پر دکھ کا اظہار کیا

نئی دہلی، وزیر اعظم نریندر مودی نے جمعرات کو گجراتی موسیقار گورانگ ویاس کے انتقال پر گہرے دکھ کا اظہار کیا۔ وزیر اعظم مودی نے ایکس پر لکھا، “گجراتی موسیقی کی دنیا کے موسیقار گورانگ ویاس کے انتقال سے ہمیں گہرا دکھ ہوا ہے۔ اپنے والد اویناش ویاس کی عظیم موسیقی کی روایت کو آگے بڑھاتے ہوئے، انہوں نے گجراتی موسیقی کے شعبے میں اپنی ایک منفرد شناخت بنائی تھی۔ ان کے انتقال سے گجرات نے ایک باصلاحیت فنکار کو کھو دیا ہے۔ گجراتی موسیقی میں ان کی بیش بہا خدمات کو ہمیشہ یاد رکھا جائے گا۔ مرحوم کی روح کی تسکین کے لیے دعا اور ان کے سوگوار خاندان اور بڑی تعداد میں موجود ان کے مداحوں سے اظہارِ تعزیت… اوم شانتی…!!”

قابل ذکر ہے کہ گجراتی فلمی دنیا کے معروف موسیقار اور نغمہ نگار آنجہانی اویناش ویاس کے بیٹے گورانگ ویاس کا بدھ کی دیر رات احمد آباد میں انتقال ہوگیا۔ ان کے انتقال کی خبر سامنے آتے ہی گجراتی فلم اور موسیقی کی دنیا میں سوگ کی لہر دوڑ گئی۔ وہ طویل عرصے سے گجراتی موسیقی کی دنیا میں سرگرم تھے اور 100 سے زائد گجراتی فلموں میں موسیقی دے چکے تھے۔