وارانسی: گنگا کی پانی کی سطح آب کم ہونے کے بعد منی کرنیکا گھاٹ پر صفائی، تہہ سے 100 کلو کپڑے نکالے گئے

وارانسی، اتر پردیش کے وارانسی ضلع میں گنگا ندی کی پانی کی سطح کم ہونے کے بعد منگل کو منی کرنیکا گھاٹ پر میونسپل کارپوریشن کی جانب سے بڑے پیمانے پر صفائی مہم چلائی گئی۔ مہم کے دوران دریا کی تہہ سے تقریباً 100 کلو گرام چھوڑے گئے کپڑے اور کچرا نکالا گیا۔ سیلاب کا پانی اترنے کے بعد ’نمامی گنگے‘ کے رضاکاروں نے میونسپل کارپوریشن کے صفائی برانڈ ایمبیسیڈر راجیش شکلا اور کارپوریشن کے ملازمین کے ساتھ مل کر یہ خصوصی مہم چلائی، تاکہ دریا کے ماحولیاتی نظام اور آبی حیات کو نقصان سے بچایا جا سکے۔
منی کرنیکا گھاٹ کی تہہ اور کناروں سے نکالے گئے کپڑوں اور پلاسٹک کو جمع کرکے باہر نکالا گیا۔ میونسپل کارپوریشن انتظامیہ نے عقیدت مندوں سے اپیل کی ہے کہ وہ اسنان یا مذہبی رسومات کی ادائیگی کے بعد اپنے کپڑے دریا میں نہ چھوڑیں۔
گنگا سیوک راجیش شکلا نے بتایا کہ گنگا میں سیلاب آنے اور پھر پانی کی سطح کم ہونے کے بعد گھاٹوں پر بڑی مقدار میں گاد، پلاسٹک اور عقیدت کے نام پر چھوڑے گئے پرانے کپڑے جمع ہو جاتے ہیں۔ گنگا کے کناروں اور پانی میں اسنان کرنے کے بعد پرانے کپڑے، پلاسٹک یا پوجا کا سامان نہ چھوڑنے کی مسلسل اپیل کی جا رہی ہے، تاکہ گنگا کو آلودگی سے محفوظ رکھا جا سکے۔
انہوں نے کہا کہ گنگا ندی صرف ہماری زندگی کا ذریعہ ہی نہیں بلکہ ہماری ثقافت اور شناخت کا بھی حصہ ہے۔ اسے صاف ستھرا اور رواں رکھنے کے لیے حکومت کی کوششوں کے ساتھ ساتھ شہریوں کی فعال شراکت اور ذمہ داری بھی انتہائی اہم ہے۔ اس صفائی مہم میں میونسپل کارپوریشن کے صفائی ملازمین نے بھی حصہ لیا۔