نہرو ڈیجیٹل آرکائیو کو پہلے سال میں 10 لاکھ سے زائد منفرد افراد نے دیکھا

نئی دہلی، ۔ جواہر لعل نہرو کی منتخب تصانیف پر مشتمل ڈیجیٹل آرکائیو ’نہرو آرکائیو ڈاٹ ان‘ کو اپنے پہلے سال میں 10 لاکھ سے زیادہ منفرد افراد نے دیکھا ، جبکہ اس کے پیج 40 لاکھ سے زائد مرتبہ کھولے گئے ہیں۔کانگریس کے جنرل سکریٹری جے رام رمیش نے ہفتہ کو سوشل میڈیا پلیٹ فارم ’ایکس‘ پر اس ڈیجیٹل آرکائیو کا ایک سال مکمل ہونے کے موقع پر یہ اطلاع دی۔ رمیش نے بتایا کہ اس ڈیجیٹل مجموعے میں 1903 سے 1964 تک کے عرصے پر محیط جواہر لعل نہرو کی منتخب تصانیف کی 100 جلدیں دستیاب ہیں۔ ان میں تقریباً 77 ہزار صفحات، 34 ہزار سے زائد تحریری دستاویزات اور 3 ہزار سے زیادہ تصاویر شامل ہیں۔ ان کے مطابق، بیسویں صدی کے ہندوستان کو سمجھنے کے لیے یہ مجموعہ ایک اہم بنیادی ماخذ کی حیثیت رکھتا ہے۔انہوں نے کہا کہ یہ ڈیجیٹل آرکائیو اسمارٹ فون کے لیے بھی موزوں ہے۔ اس میں مواد کی آسانی سے تلاش، مفت ڈاؤن لوڈ اور ترجمے کی سہولت موجود ہے۔ اسے انٹرنیٹ استعمال کرنے والوں، خصوصاً نوجوانوں کو مدنظر رکھتے ہوئے تیار کیا گیا ہے۔ عام لوگوں، طلبہ، محققین، مورخین، صحافیوں اور نہرو کے مداحوں کے ساتھ ساتھ ان کے ناقدین نے بھی اس میں دلچسپی ظاہر کی ہے۔جے رام رمیش نے بتایا کہ آرکائیو کے اگلے ایڈیشن ’نہرو آرکائیو2@‘ میں منتخب تصانیف کے علاوہ ہندوستان اور بیرون ملک کے متعدد دیگر ذرائع سے نہرو سے متعلق مواد بھی شامل کیا جائے گا۔ اس میں خطوط، تصاویر، دستاویزات، کتابیں، فلمیں، آڈیو ریکارڈنگ اور نہرو کی زندگی کے دوران شائع ہونے والے کارٹون اور خاکے بھی شامل ہوں گے۔انہوں نے کہا کہ ’نہرو آرکائیو ڈاٹ ان‘ جواہر لعل نہرو میموریل فنڈ کی ایک پہل ہے۔ اس فنڈ کے ٹرسٹ ڈیڈ پر 21 دسمبر 1964 کو اس وقت کے نائب صدر جمہوریہ ڈاکٹر ذاکر حسین اور وزیر اعظم لال بہادر شاستری سمیت 30 دیگر ممتاز شخصیات نے دستخط کیے تھے۔ جے رام رمیش نے اس وقت کے صدر جمہوریہ ڈاکٹر سروپلی رادھا کرشنن کی جانب سے جاری کردہ اپیل کا بھی ذکر کیا۔
اپنی پوسٹ میں کانگریس جنرل سکریٹری جے رام نے نہرو کی وراثت کے حوالے سے الزام لگایا کہ ان کی شبیہ خراب کرنے اور ان پر تنقید کرنے کی کوششیں کی جاتی ہیں۔ ان کے مطابق، ڈیجیٹل آرکائیو نہرو کی وراثت کو محفوظ رکھنے، اس کا تحفظ کرنے اور اسے بڑے پیمانے پر لوگوں تک پہنچانے کا ذریعہ ثابت ہوگا۔