جھارکھنڈ میں اب تک معمول سے 10 فیصد کم بارش ، 23 اگست تک ایلو الرٹ

رانچی، 19 اگست. جھارکھنڈ میں 1 جون اور 19 اگست کے درمیان 700.5 ملی میٹر کے مقابلے 633.7 ملی میٹر بارش ریکارڈ کی گئی۔ یہ معمول سے 10 فیصد کم ہے۔ محکمہ موسمیات نے بدھ کو کہا کہ 23 اگست تک ریاست کے مختلف اضلاع میں گرج چمک اور بجلی گرنے کا امکان ہے۔ اس دوران 30 سے 40 کلومیٹر فی گھنٹہ کی رفتار سے تیز ہوائیں چلنے کا بھی امکان ہے۔ اس سلسلے میں محکمہ کی جانب سے نوٹیفکیشن جاری کر دیا گیا ہے۔

محکمہ موسمیات کے مطابق جھارکھنڈ کے اوپر کم دباو¿ کا علاقہ اب کمزور ہو گیا ہے۔ تاہم، اگلے ایک یا دو دنوں تک دارالحکومت رانچی سمیت ریاست کے مختلف حصوں میں ہلکی سے اوسط بارش کا امکان ہے۔

محکمہ موسمیات کے مطابق گزشتہ 24 گھنٹوں کے دوران ریاست میں سب سے زیادہ 190 ملی میٹر بارش رام گڑھ ضلع کے پتراتو میں ریکارڈ کی گئی۔ اس دوران زیادہ سے زیادہ درجہ حرارت چائیباسا میں 32 ڈگری سیلسیس اور لاتیہار میں کم سے کم درجہ حرارت 21.3 ڈگری سیلسیس ریکارڈ کیا گیا۔

اس دوران بدھ کو رانچی اور آس پاس کے علاقوں میں صبح سے ہلکی بارش کا سلسلہ جاری رہا۔ دن بھر موسم ابر آلود اور خوشگوار رہا۔ رانچی میں زیادہ سے زیادہ درجہ حرارت 24.5 ڈگری اور کم سے کم 22.5 ڈگری سیلسیس ریکارڈ کیا گیا۔

جمشید پور میں زیادہ سے زیادہ درجہ حرارت 26.8 اور کم سے کم 25 ڈگری سیلسیس ریکارڈ کیا گیا، ڈالٹن گنج میں زیادہ سے زیادہ 27.3 اور کم سے کم 25.5 ڈگری، بوکارو میں زیادہ سے زیادہ 29.2 اور کم سے کم 23.5 ڈگری اور چائیباسا میں زیادہ سے زیادہ 32 اور کم سے کم 23.8 ڈگری سیلسیس ریکارڈ کیا گیا۔