ایل جی منوج سنہا نے کٹرا میں ماتا وشنو دیوی کے درشن کیے

جموں،جموں و کشمیر کے لیفٹیننٹ گورنر منوج سنہا نے ہفتہ کے روز ضلع ریاسی کی تریکوٹہ پہاڑیوں پر واقع ماتا ویشنو دیوی کے مقدس مندر پر حاضری دی اور پوجا کی۔ اس موقع پر انہوں نے سبھی لوگوں کے امن، اچھی صحت اور خوشحالی کے لیے پراتھنا کی۔شری ماتا ویشنو دیوی شرائن بورڈ کے چیئرمین منوج سنہا کا یہ دورہ حالیہ دہشت گردانہ واقعات کے تناظر میں مندر کی سیکورٹی کا جائزہ لینے کے ایک روز بعد ہوا۔ جمعہ کو ڈی آئی جی ادھمپور-ریاسی رینج سورن سنگھ کوتوال نے ایس ایس پی ریاسی مکُند تِبریوال کے ہمراہ کٹرا میں سیکورٹی انتظامات کا جائزہ لیا اور کٹرا سے بھون تک یاترا کے دونوں راستوں کا پیدل معائنہ کیا۔
ادھر رواں سال ماتا ویشنو دیوی کے درشن کرنے آنے والے عقیدت مندوں کی تعداد میں نمایاں اضافہ درج کیا گیا ہے۔ جنوری سے اکتوبر 2026 تک 83.20 لاکھ یاتریوں نے ماتا کے درشن کیے، جو پورے سال 2025 میں ریکارڈ کی گئی 69.78 لاکھ یاتریوں کی تعداد سے بھی زیادہ ہے۔ یاتریوں کی موجودہ تعداد سال 2024 کے دوران درج کیے گئے 94.84 لاکھ کے ریکارڈ کے قریب پہنچ رہی ہے۔
قابل ذکر ہے کہ 11 نومبر کو جنوبی کشمیر کے ضلع کولگام میں دہشت گردانہ حملے کے دوران سی آر پی ایف کے تین اہلکار زخمی ہوئے تھے، جبکہ 12 نومبر کو ضلع کشتواڑ کے دور افتادہ علاقے دچھن کے جنگلات سے دو اسپیشل پولیس افسران کی گولیوں سے چھلنی لاشیں برآمد ہوئی تھیں۔ ان واقعات کے بعد مذہبی مقامات اور یاترا کے راستوں پر سیکورٹی انتظامات کی اہمیت بڑھ گئی ہے۔