آگر مالوا میں فور لین پر خوفناک سڑک حادثہ، تیز رفتار کار ٹرک سے ٹکرائی، ماں اور بیٹی کی موت، تین زخمی

آگر مالوا، 25 اگست (ہ س)۔ مدھیہ پردیش کے ضلع آگر مالوا میں اجین-گروٹھ فور لین پر منگل کی صبح تقریباً 6 بجے گاوں راما کھیڑی کے قریب ایک تیز رفتار ارٹیگا کار آگے چل رہے ٹرک سے ٹکرا گئی۔ حادثہ اتنا شدید تھا کہ کار کے پرخچے اڑ گئے۔ اس سڑک حادثے میں کار سوار ماں بیٹی کی موقع پر ہی موت ہو گئی، جبکہ تین دیگر افراد شدید طور پر زخمی ہو گئے۔ تمام کار سوار اتر پردیش کے ساکن بتائے جا رہے ہیں۔

اطلاعات کے مطابق کار اتر پردیش کے نمبر کی تھی اور صبح فور لین سے گزر رہی تھی۔ راما کھیڑی کے پاس ڈرائیور گاڑی پر قابو نہ رکھ سکا اور کار براہِ راست آگے چل رہے ٹرک سے جا ٹکرائی۔ ٹکر کے بعد کار بری طرح تباہ ہو گئی اور اس میں سوار افراد اندر پھنس گئے۔ حادثے کی اطلاع ملتے ہی ایمبولینس پائلٹ سندیپ گوسوامی اور امریش موقع پر پہنچے۔ انہوں نے امدادی کارروائیاں شروع کرتے ہوئے کار میں پھنسے زخمیوں کو باہر نکالا۔ ایک خاتون کار میں بری طرح پھنس گئی تھیں جنہیں نکالنے میں کافی مشقت کرنی پڑی۔ زخمیوں کو فوری علاج کے لیے سرکاری کمیونٹی ہیلتھ سینٹر بڑود لے جایا گیا۔ بڑود پولیس بھی موقع پر پہنچی اور حادثے کی تفتیش شروع کی۔ نیشنل ہائی ویز اتھارٹی آف انڈیا کی ایمبولینس کی مدد سے دونوں متوفیان کی لاشیں سرکاری اسپتال بڑود پہنچائی گئیں۔

پولیس کے مطابق متوفیان کی شناخت ساریکا زوجہ شیام لال اور ان کی بیٹی چھوی کے طور پر ہوئی ہے۔ حادثے میں سورج پال، سچن اور شیام زخمی ہوئے ہیں۔ متوفیان کے اہل خانہ کو اطلاع دے دی گئی ہے، جن کے پہنچنے کے بعد لاشوں کا پوسٹ مارٹم کرایا جائے گا۔

کمیونٹی ہیلتھ سینٹر بڑود میں ڈاکٹر وجیندر چوڑیہار نے زخمیوں کو ابتدائی طبی امداد دی۔ ان کی حالت تشویشناک ہونے کے باعث تینوں کو بہتر علاج کے لیے ضلع اسپتال آگر ریفر کر دیا گیا۔ ابتدائی تفتیش میں سامنے آیا ہے کہ ارٹیگا ڈرائیور گاڑی پر اپنا کنٹرول کھو بیٹھا تھا جس کے بعد کار آگے چل رہے ٹرک میں پیچھے سے جا گھسی۔ حادثے کے بعد فور لین پر کچھ دیر کے لیے افرا تفری کا ماحول بن گیا۔ پولیس نے جائے حادثہ کا معائنہ کر کے معاملے کی تفتیش شروع کر دی ہے۔ حادثے کی اصل وجوہات کا پتہ تفتیش مکمل ہونے کے بعد ہی چل سکے گا۔