کرسمس پر تبدیلی مذہب نہ ہو

لکھنؤ:دسمبر۔سی ایم یوگی نے افسران کے ساتھ امن و قانون کی جائزہ میٹنگ کی۔ انہوں نے کہا کہ کرسمس کے موقع پر تبدیلی مذہب کے واقعات نہیں ہونے چاہئیں۔ یہ بھی دیکھا جائے کہ مساجد سے لاؤڈ سپیکر ہٹائے گئے؟ دوبارہ وہاں نہ لگائے جائیں۔ وزیراعلیٰ نے کہا کہ عوام کے مسائل ترجیحی بنیاد پر حل کئے جائیں۔ کووڈ سے بچاؤ کی تیاریوں کے حوالے سے انہوں نے کہا کہ لوگوں کو آگاہ کیا جائے۔ ابھی سے ماسک اور جسمانی فاصلے کا خیال رکھنا ہوگا۔یوگی نے کہا کہ چند ماہ قبل مزارات سے لاؤڈ اسپیکر ہٹا دیے گئے تھے۔ حال ہی میں اضلاع کے دوروں کے دوران میں نے دیکھا کہ بعض اضلاع میں یہ لاؤڈ سپیکر دوبارہ لگائے جا رہے ہیں۔ یہ قابل قبول نہیں ہے۔ آنے والا 25 دسمبر کرسمس کا تہوار ہے۔ تمام مذہبی رہنماؤں سے بات چیت کریں۔ کرسمس کی تقریب پرامن ماحول میں منائی جائے۔یوگی نے کہا کہ کمشنر، ڈی ایم، ایس ایس پی، ڈی آئی او ایس سمیت تمام افسران کو براہ راست لوگوں سے بات کرنی چاہئے۔ وزیراعلیٰ نے کہا کہ پچھلے کچھ دنوں سے کئی ممالک میں کووڈ کے معاملات میں اضافہ دیکھا جا رہا ہے۔ یوپی میں اب حالات بالکل نارمل ہیں۔ پھر بھی ہمیں محتاط رہنا ہوگا۔ یہ گھبرانے کا نہیں بلکہ ہوشیار اورالرٹ رہنے کا وقت ہے۔ لوگوں کو پرہجوم عوامی مقامات جیسے ہسپتالوں، بسوں، ریلوے اسٹیشنوں، بازاروں میں چہرے کے ماسک پہننے کے لیے بیدار کریں۔