ٹائیگر شروف اور دیشا پٹانی نے راہیں جدا کر لیں

ممبئی،جولائی ۔بالی ووڈ کے معروف اداکار و ڈانسر ٹائیگر شروف اور اداکارہ دیشا پٹانی کے قریبی دوست نے اداکاروں کے درمیان علیحدگی کے حوالے سے سوشل میڈیا پر گردش کرتی خبروں کی تصدیق کر دی۔اداکار ٹائیگر شروف اور اداکارہ دیشا پٹانی کے حوالے سے کئی سالوں سے افواہیں تھیں کہ دونوں کے ایک دوسرے کے ساتھ قریبی تعلقات ہیں اور جلد شادی کریں گے۔تاہم اب میڈیا رپورٹس کے مطابق 6 سال سے زائد عرصہ ساتھ رہنے کے بعد دونوں اداکاروں کے درمیان بریک اپ ہو گیا ہے۔رپورٹس کے مطابق اداکار کے قریبی دوست نے میڈیا کو بتایا کہ ٹائیگر اور دیشا اب ایک ساتھ نہیں ہیں۔واضح رہے کہ گزشتہ برس سے ان دونوں کے درمیاں کشیدگی کی خبریں گردش کر رہی تھیں۔اب یہ خبریں سامنے آ رہی ہیں کہ دونوں اداکاروں نے رواں سال کے آغاز میں ہی ایک دوسرے سے راہیں جدا کر لی تھیں۔یہ بات ابھی واضح نہیں ہوئی ہے کہ ان کے درمیان کیا ہوا ہے لیکن وہ دونوں اب سنگل ہیں۔خیال رہے کہ بریک اپ کے حوالے سے ان دونوں اداکاروں کی جانب سے تاحال کوئی تصدیق سامنے نہیں آئی ہے۔