امریکہ میں برفانی طوفان کی شدت میں کمی آنے لگی، 70 افراد ہلاک

واشنگٹن، دسمبر۔ امریکہ بھر میں برفانی طوفان اور بم سائیکلون نے تباہی مچا دی ہے، جس سے اب تک 70 سے زائد افراد ہلاک ہو چکے ہیں، تاہم دوسری طرف برفانی طوفان کی شدت میں کمی بھی آنے لگی ہے۔امریکی میڈیا کے مطابق طاقت ور طوفانی سسٹم نے گزشتہ ہفتے پورے امریکہ کو اپنی لپیٹ میں لے لیا تھا، جس نے مغرب، میدانی علاقوں اور مڈویسٹ میں خطرناک حالات پیدا کیے، اس کے بعد برفانی طوفان تیزی سے ایک بم سائیکلون میں تبدیل ہو گیا، اور اس نے کینیڈا اور امریکا کی پانچ بڑی جھیلوں والے پورے علاقے کو شدید نقصان دہ یخ بستہ ہواؤں کے ساتھ گھیر لیا۔طوفان کے مرکزی دباؤ میں 24 گھنٹوں میں 30 ملی بار کی کمی واقع ہوئی، جو باضابطہ طور پر بمبوجنیسز (شدید برفانی طوفان) کے معیار سے آگے نکل گئی، جو 24 گھنٹوں میں 24 ملی بار کی کمی ہے۔امریکی میڈیا کے مطابق ریاست نیویارک کی اری اور نیاگرا کاؤنٹیز میں برفانی طوفان نے مزید جانیں لی ہیں، اری کاؤنٹی کے ایگزیکٹو مارک پولون کارز نے بدھ کے روز بتایا کہ یہاں مزید 37 اموات رپورٹ ہوئی ہیں، جس میں بفیلو شہر بھی شامل ہے، بفیلو شہر میں ٹریفک کنٹرول کرنے کے لیے نیویارک اسٹیٹ پولیس کی اضافی نفری طلب کی گئی ہے۔امریکہ کے سوا لاکھ گھر تاحال بجلی سے محروم ہیں، سرد موسم کی وجہ سے امریکا اور کینیڈا کی سرحد پر موجود نیاگرا آبشار کا بڑا حصہ جم چکا ہے۔